पूर्वअर्थमन्त्री पौडेल थप तीन दिन थुनामा

काठमाडौं । एमाले उपाध्यक्ष एवं पूर्वउपप्रधानमन्त्री विष्णुप्रसाद पौडेललाई थप तीन दिन थुनामा राखेर अनुसन्धान गर्न विशेष अदालतले अनुमति दिएको छ ।
विशेषका न्यायाधीशहरू नारायणप्रसाद पौडेल, हेमन्त रावल र उमेश कोइरालाको इजलासले सोमबार सम्पत्ति शुद्धीकरण अनुसन्धान विभागको मागअनुसार पौडेलमाथि थप अनुसन्धान गर्न तीन दिन म्याद थप गर्ने आदेश दिएको हो ।
सम्पत्ति शुद्धीकरण कसुरमाथिको अनुसन्धानका लागि भन्दै यही असार ८ गते सुर्खेतबाट पक्राउ गरी काठमाडौं ल्याइएका पौडेललाई २० दिन थुनामा राख्नका लागि विभागले विशेष अदालतसँग अनुमति मागेको थियो , अदालतले पहिलो पटकका लागि थुनामा राखेर अनुसन्धान गर्न सात दिनका लागि मात्रै अनुमति दिएको थियो । उक्त म्याद सकिएपछि अनुसन्धान अझै बाँकी रहेको भन्दै विभागले पुनः म्याद थपको माग गरेको हो । अदालतले अनुसन्धानका लागि दोस्रो पटक तीन दिनको मात्रै म्याद थप गरेको छ । पूर्वअर्थमन्त्री पौडेल विभागको न्यायिक हिरासतमा छन् । 
पौडेललाई पक्राउअघि उनको भैंसेपाटीस्थित निवासमा समेत छापा मारिएको थियो । उनलाई आफ्नो पदको दुरुपयोग गरी व्यवसायी दीपक भट्टलाई सेयर खरिद प्रक्रियामा सहजीकरण गरेको आरोपमा सम्पत्ति शुद्धीकरण अनुसन्धान विभागले अनुसन्धान गरिरहेको छ ।
पक्राउ गैरकानुनी रहेको दाबी गर्दै पत्नी दोमाया पौडेलले सर्वोच्च अदालतमा बन्दीप्रत्यक्षीकरणको रिट दायर गरेकी थिइन् । उक्त रिटमाथि सुनुवाइ गर्दै सर्वोच्चका न्यायाधीश श्रीकान्त पौडेलले गत बिहीबार विपक्षीका नाममा कारण देखाऊ आदेश जारी गरेका थिए ।
आफ्ना शीर्ष नेता पक्राउविरुद्ध एमालेले यसपटक विज्ञप्ति जारी गरेर भत्र्सना गर्दै औपचारिकता मात्रै पुरा गरेको छ । अध्यक्ष ओलीलाई पक्राउ गर्दाजस्तो सडकमा निस्किएको छैन ।
पौडेल पक्राउ लगत्तै पार्टीले सचिवालय र संसदीय दलको बैठक गरेको थियो । त्यसमा अध्यक्ष ओलीले सरकार प्रतिशोध साँधिरहेको भन्दै सशक्त प्रतिवाद गरिने चेतावनी दिएका थिए ।