वीरगञ्ज बजारमा चहलपहल सुरु

वीरगञ्ज, ३० भदौ - भ्रष्टाचार विरुद्ध जेनजी पुस्ताका आन्दोलनका कारण बन्द रहेको वीरगञ्ज बजारमा चहलपहल सुरु भएको छ । गत भाद्र २४ गते युवाहरूको आन्दोलनले हिंसत्मक रूप लिएपछि स्थानीय प्रशासनले निषेधाज्ञा तथा कर्फ्यु आदेश जारी गरेको थियो ।

विकसित घटनाक्रमले सृजना गरेको तनावपूर्ण स्थिति नियन्त्रणमा आउन थालेपछि प्रशासनले विभिन्न चरणमा खुकुलो पार्दै निषेधाज्ञा हटाइएको छ भने रातको समयमा कर्फ्यु आदेश जारी गरिएको छ । सोमबार जिल्ला प्रशासन कार्यालय पर्साले एक विज्ञप्ति जारी गर्दै स्थिति सामान्य बन्दै गएको हुँदा सर्वसाधारणको दैनिकीलाई सहज बनाउन निषेधाज्ञा हटाइएको र अर्काे सूचना जारी नभएसम्म राति ९ बजेदेखि बिहान ५ बजेसम्म कर्फ्यु यथावत् रहेको बताएको छ ।

यस्तै जिल्ला प्रशासन कार्यालयले शान्ति–सुव्यवस्था कायम राख्न र जनताको जीउधन तथा सार्वजनिक सम्पत्तिको संरक्षणका लागि सबै जिल्लावासीलाई आदेशको प्रभावकारी कार्यान्वयनमा सहयोग गर्न अनुरोध गरेको छ ।

युवाहरूको आन्दोलन र अनिश्चित बजार बन्दले साना व्यापारी तथा पसलेहरू चिन्तित थिए, तर निषेधाज्ञा हटेको सूचनाले उनीहरूमा खुशियाली छाएको छ । केहीवर्ष यतादेखी बजार चलायमान हुन सकिरहेको बेला चाडवाडमा भने केही आम्दानी हुने आशा उनीहरूले लिएका छन् । यता छोटो तथा लामोदुरीका सवारीसाधनहरू पनि संचालनमा आउन थालेको छ ।

यस्तै मुलुकमा भएको राजनीतिक परिवर्तनका कारण अझैपनि ढुक्क हुने अवस्था नरहेको हुँदा जिल्लाको सुरक्षा व्यवस्था कडा पारिएको छ । वीरगञ्जको मुख्य सडकहरूमा नेपाल प्रहरी तथा सशस्त्र प्रहरी खटाइएको छ ।