साइबर सुरक्षा तथा कृत्रिम बुद्धिमत्ताबारे अन्तरक्रिया

काठमाडौं । नेपाल–भारत वाणिज्य तथा उद्योग संघले गिनिस सोलुसनको सहकार्यमा साइबर सुरक्षा तथा एआइ  विषयक अन्तक्र्रिया गरेको छ । कार्यक्रममा व्यवसायी नेतृत्व, प्रविधि क्षेत्रका विज्ञ तथा सरोकारवालाहरूको सहभागिता रहेको थियो । नेपालका संस्थाहरूमा कृत्रिम बुद्धिमत्ताको तीव्र प्रयोग र बदलिँदो साइबर सुरक्षा जोखिमका प्रभावबारे छलफल तथा विश्लेषण गरिएको थियो । 
कार्यक्रममा गिनिस सोलुसनका कार्यकारी परामर्श सल्लाहकार भीम ढकालले स्वागत गर्दै एआइ दैनिक कार्य तथा व्यावसायिक कार्यमा अपरिहार्य भइसेकेको र यसका चुनौतिहरुसँग सामना गर्न सवै क्षेत्र चनाखो भएर बस्नुपर्ने बताए ।  नेपाल–भारत वाणिज्य तथा उद्योग संघका उपाध्यक्ष कुणाल कायलले साइबर सुरक्षा उद्यमी व्यवसायीहरुका लागि समस्याका रुपमा देखापरेको बताए ।  कार्यक्रममा गिनिस सोलुसनका प्रमुख प्रविधि अधिकृत निरञ्जन कुँवरले एआइको प्रयोगसँग सम्बन्धित उदीयमान साइबर जोखिम, क्लाउडमा बढ्दो निर्भरता, सुशासन, डेटा सुरक्षा तथा संस्थागत तयारीका विषयमा प्रकाश पारेका थिए ।  जिम्मेवार ढंगले एआइको प्रयोग गर्दा देखिने व्यावहारिक चुनौती, साइबर सुरक्षा परिपक्वता, संस्थागत तयारी तथा मानव संसाधनको क्षमता लगायतका विषयमा जीवन्त प्रश्नोत्तर सत्र सञ्चालन भएको थियो ।
कार्यक्रममा नेपाल उद्योग वाणिज्य महासंघका सदस्य तथा आइसिटी विकास समितिकी अध्यक्ष एवं गिनिस सोलुसनकी बिजनेस हेड सुनैना घिमिरे पाण्डेले धन्यवाद व्यक्त गरिन् ।