नेभिगेशन
विश्व

गार्मेन्ट कामदारको न्यूनतम तलब बढाउन सहमति

ढाका (एजेन्सी) । पाँच दिनदेखि जारी आन्दोलन र प्रहरीसँगको झडपपछि बंगलादेशका गार्मेन्ट उद्योगका कामदारको न्यूनतम तलब बढाउन रोजगारदाता र श्रमिक प्रतिनिधिबीच सहमति जुटेको छ । बुधबार बसेको न्यूनतम ज्याला बोर्डको बैठकमा आगामी डिसेम्बरदेखि नयाँ तलब संरचना लागू गर्ने सहमति भएको हो ।
यद्यपि कामदारको तलब कति बढाउने भन्ने विषयमा भने निर्णय भइसकेको छैन । नयाँ तलब संरचना डिसेम्बर १ देखि लागू गर्ने र त्यसअनुसारको बढेको पारिश्रमिक जनवरीमा वितरण गर्ने सहमति भएको बंगलादेशको समाचार संस्था बीडीन्यूज२४ र द बिजनेस स्ट्यान्डर्डले जनाएका छन् ।
बोर्डमा श्रमिकको प्रतिनिधित्व गर्ने बाबुल अख्तरले दुवै पक्ष नयाँ तलब संरचना लागू गर्ने समयसीमामा सहमत भएको बताए । उनले आन्दोलनरत कामदारलाई धैर्य गर्न र कार्यस्थलमा फर्किन आग्रहसमेत गरेका छन् । रोजगारदाता प्रतिनिधि एबीएम शम्सुद्दिनले पनि सहमतिलाई समर्थन गरेका छन् ।
बंगलादेशका गार्मेन्ट कामदारले हाल कायम मासिक न्यूनतम तलब १२ हजार ५०० टाका बढाएर ३० हजार टाका पु¥याउन माग गर्दै आएका छन् । उनीहरूको मागअनुसार तलब वृद्धि भए हालको तुलनामा १४० प्रतिशतले पारिश्रमिक बढ्नेछ । खाद्यान्न, घरभाडा, यातायात र स्वास्थ्य उपचारको खर्च बढ्दै गए पनि तलब नबढ्दा जीवनयापन कठिन भएको श्रमिकको भनाइ छ । बंगलादेशमा मुद्रास्फीति करिब ८ प्रतिशत पुगेको छ ।
गत शनिबारदेखि सुरु भएको आन्दोलन राजधानी ढाकासहित गाजिपुर, मिरपुर, नारायणगञ्ज र सावारका औद्योगिक क्षेत्रमा फैलिएको थियो । आन्दोलनका क्रममा कामदारले सडक अवरुद्ध गर्नुका साथै प्रहरीमाथि इँटा र ढुंगा प्रहार गरेका थिए । प्रहरीले भीड नियन्त्रण गर्न अश्रुग्यास र ध्वनि ग्रिनेड प्रयोग गरेको थियो । केही स्थानमा प्रहरीका सवारीसाधनमा आगजनीसमेत भएको अन्तर्राष्ट्रिय समाचार संस्था एएफपी र रोयटर्सले जनाएका छन् ।
आन्दोलनका कारण सयौं कारखानाको उत्पादन प्रभावित भएको छ । केही दिनअघि मात्रै ६७० भन्दा बढी कारखानाका कामदार काम छाडेर आन्दोलनमा उत्रिएका थिए । कतिपय कारखाना अस्थायी रूपमा बन्द गरिएका छन् । यसले अन्तर्राष्ट्रिय बजारमा हुने तयारी पोसाकको आपूर्ति र निर्यातमा समेत असर पार्ने चिन्ता बढाएको छ ।
करिब १७ करोड जनसंख्या भएको बंगलादेश चीनपछि विश्वकै दोस्रो ठूलो तयारी पोसाक निर्यातकर्ता मुलुक हो । यहाँ विश्वका चर्चित ब्रान्डका लागि कपडा उत्पादन गरिन्छ । यस क्षेत्रमा ४० लाखभन्दा बढी कामदार कार्यरत छन् । मुलुकको कुल निर्यात आम्दानीको ८० प्रतिशतभन्दा बढी हिस्सा यही उद्योगले ओगटेको छ ।
करिब चार दशकदेखि बंगलादेशको अर्थतन्त्रको प्रमुख आधार बनेको गार्मेन्ट उद्योगमा न्यून पारिश्रमिक, कमजोर कार्य वातावरण र श्रमिक अधिकारका विषयमा विवाद हुँदै आएको छ । श्रमिक आन्दोलन लम्बिए उत्पादन र निर्यात प्रभावित हुने तथा अन्तर्राष्ट्रिय खरिदकर्ताको विश्वास कमजोर हुन सक्ने उद्योगीहरूको चिन्ता छ ।

प्रकाशित मिति:
प्रतिक्रिया दिनुहोस्