नेभिगेशन
अर्थतन्त्र

नेपालको अर्थतन्त्र सकारात्मक बाटोमा, विदेशी मुद्रा सञ्चिति र रेमिट्यान्समा उल्लेख्य वृद्धि

काठमाडौं । नेपाल राष्ट्र बैंकले आर्थिक वर्ष २०८३÷८४ को पहिलो तीन महिना (असोज मसान्तसम्म) को तथ्याङ्कमा आधारित देशको वर्तमान आर्थिक तथा वित्तीय स्थितिको प्रतिवेदन सार्वजनिक गरेको छ । 
प्रतिवेदनअनुसार मुलुकको बाह्य क्षेत्र बलियो रहँदा विदेशी मुद्रा सञ्चिति, रेमिट्यान्स आप्रवाह, चालु खाता र शोधनान्तर स्थिति सबै बचतमा रहेका छन् । उपभोक्ता मूल्य सूचकाङ्कमा आधारमा ६ दशमलव ३७ प्रतिशत मुल्यवृद्धि भएको छ भने निर्यातमा उल्लेखनीय वृद्धि देखिएको छ ।
वार्षिक विन्दुगत आधारमा असोज महिनामा उपभोक्ता मुल्यवृद्धि ६ दशमलव ३७ प्रतिशत रहेको छ । अघिल्लो वर्षको सोही महिनामा यो १ दशमलव ४७ प्रतिशत मात्र थियो । खाद्य तथा पेय पदार्थ समूहको मुल्यवृद्धि ८ दशमलव ०४ प्रतिशत र गैर–खाद्य तथा सेवा समूहको ५ दशमलव ४६ प्रतिशत छ । तीन महिनाको औसत मुल्यवृद्धि ६ दशमलव २२ प्रतिशत रहेको छ । 
ग्रामीण क्षेत्रमा ६ दशमलव ६३ प्रतिशत र सहरी क्षेत्रमा ६ दशमलव २८ प्रतिशत मुल्यवृद्धि देखिएको छ। मधेश प्रदेशमा सबैभन्दा उच्च ७ दशमलव ३७ प्रतिशत र सुदूरपश्चिममा सबैभन्दा कम ५ दशमलव १३ प्रतिशत मुल्यवृद्धि रहेको छ । थोक मुल्यवृद्धि ७ दशमलव २९ प्रतिशत पुगेको छ । 
बाह्य क्षेत्रतर्फ स्थिति उत्साहजनक 
 कुल विदेशी विनिमय सञ्चिति २०८३ असार मसान्तको ३८ खर्ब ९७ अर्ब ६७ करोडबाट ६ दशमलव ८ प्रतिशतले वृद्धि भई असोज मसान्तमा ४१ खर्ब ६१ अर्ब १४ करोड पुगेको छ । अमेरिकी डलरमा यो सञ्चिति २७ अर्ब ३९ करोड रहेको छ । यो सञ्चिति १९ दशमलब ९ महिनाको वस्तु आयात र १७ दशमलव २ महिनाको वस्तु तथा सेवा आयात धान्न पर्याप्त छ । कुल गार्हस्थ्य उत्पादनसँग सञ्चितिको अनुपात ६३ प्रतिशत, कुल आयातसँग १४३ दशमलव ७ प्रतिशत र विस्तृत मुद्राप्रदायसँग ४४ दशमलव ८ प्रतिशत रहेको छ । 
नेपाल राष्ट्र बैंकसँगको सञ्चिति ३६ खर्ब ९५ अर्ब २४ करोड र अन्य बैंक तथा वित्तीय संस्थासँग ४ खर्ब ६५ अर्ब ९० करोड छ । भारतीय मुद्राको अंश २१ प्रतिशत रहेको छ । चालु खाता २ खर्ब ७९ अर्ब ११ करोडले बचतमा रहेको छ भने शोधनान्तर स्थिति ३ खर्ब ३ अर्ब ७९ करोडले बचतमा छ । अमेरिकी डलरमा चालु खाता १ अर्ब ८२ करोड र शोधनान्तर १ अर्ब ९८ करोड बचतमा छ । 
विप्रेषण आप्रवाह नेपाली रुपैयाँमा २७ दशमलव २ प्रतिशतले वृद्धि भई ७ खर्ब ३ अर्ब ७० करोड पुगेको छ । असोज महिनामा मात्र २ खर्ब ६७ अर्ब ३४ करोड रेमिट्यान्स भित्रिएको छ । अमेरिकी डलरमा रेमिट्यान्स १६ दशमलव ७ प्रतिशतले बढेर ४ अर्ब ६० करोड पुगेको छ । खुद दोस्रो आम्दानी (खुद ट्रान्सफर) ७ खर्ब ६२ अर्ब ९० करोड रहेको छ । 
वैदेशिक व्यापारमा पनि सकारात्मक संकेत देखिएको छ । तीन महिनामा कुल वस्तु निर्यात ५७ प्रतिशतले वृद्धि भई १ खर्ब १४ अर्ब २९ करोड पुगेको छ। भारत, चीन र अन्य मुलुकतर्फको निर्यात क्रमशः ६१ दशमलव ७ प्रतिशत, २५९ दशमलव ७ प्रतिशत र ३३ दशमलव ८ प्रतिशतले बढेको छ। 
असोज मसान्तमा सरकारको नगद मौज्दात ३ खर्ब ५९ अर्ब ९० करोड रहेको छ । प्रदेश सरकारहरूको खर्च २० अर्ब ७४ करोड र स्रोत परिचालन ६० अर्ब १२ करोड छ । मौद्रिक क्षेत्रमा विस्तृत मुद्राप्रदाय तीन महिनामा ४ दशमलव ४ प्रतिशतले बढेको छ भने वार्षिक विन्दुगत आधारमा १४ दशमलव ८ प्रतिशतले बढेको छ । खुद वैदेशिक सम्पत्ति ३ खर्ब ३ अर्ब ७९ करोडले बढेको छ । सञ्चित मुद्रा ३७ दशमलव ९ प्रतिशतले बढेको छ । कुल आन्तरिक दाबी ० दशमलव ७ प्रतिशतले बढेको छ भने सरकारमाथिको खुद दाबी १५ दशमलव ९ प्रतिशतले घटेको छ । निजी क्षेत्रमाथिको दाबी ३ दशमलव ३ प्रतिशतले बढेको छ । बैंक तथा वित्तीय संस्थाको निक्षेप परिचालन २ दशमलव ८ प्रतिशतले बढेर ८५ खर्ब ९ अर्ब ८२ करोड पुगेको छ । वार्षिक आधारमा निक्षेप १३ दशमलव ७ प्रतिशतले बढेको छ । निक्षेप संरचनामा चल्ती ७ दशमलव ६ प्रतिशत, बचत ४९ दशमलव ३ प्रतिशत र मुद्दती ३४ प्रतिशत छ । निजी क्षेत्रमा प्रवाहित कर्जा ३ दशमलव १ प्रतिशतले बढेर ६० खर्ब ४१ अर्ब २५ करोड पुगेको छ । वार्षिक आधारमा कर्जा ८ दशमलव ३ प्रतिशतले बढेको छ । गैर–वित्तीय संस्थागत क्षेत्रतर्फ ६२ दशमलव ९ प्रतिशत र व्यक्तिगत तथा घरपरिवारतर्फ ३७ दशमलव १ प्रतिशत कर्जा प्रवाहित भएको छ । खनिज क्षेत्र, यातायात उपकरण उत्पादन, धातुजन्य उत्पादन लगायत क्षेत्रमा कर्जा वृद्धि देखिएको छ । ब्याजदरमा मिश्रित अवस्था छ ।

प्रकाशित मिति:
प्रतिक्रिया दिनुहोस्