महरा थुनिन्छन् कि छुट्लान् ?

काठमाडौं, २८ असोज - नेकपा माओवादी केन्द्रका नेता एवं पूर्वसभामुख कृष्णबहादुर महरालाई मंगलबार बयान गराई हिरासतमै पठाइएको छ । बुधबार मात्रै पुर्पक्षका लागि सुनुवाइपछि उनलाई पुर्पक्षका लागि थुनामा राख्ने कि थुनामुक्त गर्ने भन्ने विषयमा टुंगो लाग्नेछ ।

काठमाडौं जिल्ला अदालतमा उनलाई मंगलबार बयान मात्रै गराइएको छ । महरालाई भन्सार छलेर ल्याएको भेप (इलेक्ट्रिक सिगरेट)भित्र रहेको सुन जाँच पास गरिदिन भन्सारमा फोन गरेकै कारण संगठित अपराधमा पक्राउ गरी मुद्दा दर्ता गरिएको छ । महराले बयानमा सुनको अवैध तस्करीमा आफ्नो कुनै पनि संलग्नता नभएको अदालतसमक्ष बयान दिएका छन् । उनले आफ्ना परिवारका सदस्यलाई कुनै राजनैतिक संरक्षण नगरेको दाबी छ । ‘चिनिया नागरिकले भेपभित्र लुकाइछिपाइ ल्याएको सुन अवैधरूपमा नेपाल भिœयाउन मेरो कुनै लगानी छैन’ उनले भनेका छन् । 

सुन तस्करीको आरोपमा आइतबार पक्राउ परेका महरालाई संगठित अपराधमा ८ करोड ५५ लाख रुपैयाँ बिगोको आधारमा साढे सात वर्ष कैद माग गर्दै मुद्दा दर्ता गरिएको छ । पूर्व अतिविशिष्ट व्यक्ति रहेका महरा पक्राउ परेको भोलिपल्टै अर्थात् सोमबार काठमाडौं जिल्ला अदालतमा मुद्दा दर्ता गर्दै पाँच वर्षमा थप कैद सजाय मागदाबी गरिएको थियो ।

उनका छोरा राहुल भन्ने रेशम महरालाई भेप छुटाउन सघाएका थिए । उनले प्रमुख भन्सार अधिकृतलाई फोन गरेका थिए । साथै चिनिया नागरिक दावाजिन बाङसँग पनि पटकपटक फोन सम्पर्क गरेको भेटिएको थियो । त्यसकै आधारमा उनलाई संगठित अपराधमा मुद्दा दर्ता गरिएको हो ।

सरकारी वकिलको कार्यालय काठमाडौंले मुद्दा दर्ता गर्दै महरालाई तीनदेखि पाँच वर्षसम्म कैद माग गरिएको छ । कानूनअनुसार ३ करोड रुपैयाँभन्दा बढी बिगोमा तीनदेखि पाँच वर्षसम्म कैद हुनसक्ने व्यवस्था छ । उनी सार्वजनिक पदमा बसिसकेको व्यक्ति भएकाले थप ५० प्रतिशत सजायको पनि माग गरिएको छ । कानूनअनुसार साढे ७ वर्ष कैद सजाय माग गर्दै मुद्दा दर्ता भएको हो ।

काठमाडौं जिल्ला अदालतका अनुसार उनलाई भन्सार ऐनविरुद्धको कार्य गरको े , संगठित अपराध निवारण ऐनविरुद्ध काम गरेको भन्दै ८ करोड ५५ लाख २८ हजार ३७४ को आधारमा सजाय पनि माग गरिएको हो । सरकारी वकिलले दर्ता गरेको कसुरमा ‘संगठितरूपमा समूह बनाई तहगत कसुर गरेको’ अभियोग लगाइएको छ । 

चिनियाँ नागरिकले दुईवटा सुटकेसभित्र ७३ बट्टामा रहेको ७३० थान इलेक्ट्रिक सिगरेट (भेप) अवैधरूपमा त्रिभुवन अन्तर्राष्ट्रिय विमानस्थल हुँदै नेपालमा ल्याउँदै गरेको अवस्थामा जफत गरिएको थियो । जफत गरिएको सुनसहितको भेप त्रिभुवन विमानस्थल भन्सार कार्यालयको स्टोरमा राखिएको प्रहरीको दाबी छ । जफत भएको सुन भन्सारका नायव सुब्बा रेवन्त खड्कासमेतको जिम्मा र संरक्षणमा रहेको प्रहरीले जनाएको छ ।