अनुदानका मल फालेर फरार

सप्तरी । सप्तरीको राजविराज नगरपालिका – २ स्थित छिन्नमस्ता अस्पताल पछाडिबाट सप्तरी प्रहरीले ६० बोरा अनुदानका मल बरामद गरेको छ । बिहीबार साँझ साल्ट ट्रेडिङ कर्पोरेशन लिमिटेडबाट प्राप्त ६० बोरा पोटास फालेको अवस्थामा सप्तरी प्रहरीले नियन्त्रणमा लिएको हो । मधेश प्रदेश १–००१च ०७१४ नम्बरको पीकअपमा अनुदानित मल लैजाँदै गर्दा दुई/तीन जना स्थानीयले गाडी घेरेपछि मल फ्यालेर सवारीसहित फरार भएका थिए । प्रत्यक्षदर्शीले मल फालेका बारे प्रहरीलाई जानकारी गराएपछि प्रहरीले मल नियन्त्रणमा लिएको छ ।

प्रत्यक्षदर्शीले मल लैजाँदै गरेको गाडी चालकसँग वडाको सिफारिस तथा मल कहाँबाट ल्याएका बारे सोध्दा उनीहरू मल फालेर फरार बनेका थिए ।

यसअघि कात्तिक ३० गते कालोबजारी गर्दै गरेको अवस्थामा दुई सय ४० बोरा मलसहित एउटा ट्रक प्रहरीले नियन्त्रणमा लिएको थियो ।

सो मुद्दामा हनुमाननगर कंकालिनी नगरपालिका–३ पोर्तहाका मनोज यादवलाई प्रहरीले नियन्त्रणमा लिएको थियो ।