आठ वर्षपछि जिल्लास्तरीय अन्तरविद्यालय फुटबल

सिरहामा आठ वर्षपछि जिल्लास्तरीय अन्तरविद्यालय यू–१४ छात्र तथा छात्रा फुटबल प्रतियोगिता आयोजना हुने भएको छ । अखिल नेपाल फुटबल संघ (एन्फा) सिरहाको आयोजनामा सोमबारदेखि सुरु हुने यो खेलबाट विद्यालय तहबाटै खेलाडीको प्रतिभा पहिचान तथा विकास गर्नु रहेको एन्फा सिरहाका संयोजक सरोजकुमार आलेले बताए ।

प्रतियोगिताको मुख्य प्रायोजक लहान मेरी चिल्ड्रेन एकेडेमी स्कूल रहेको छ । खेलहरू लहान नगरपालिका–१० स्थित खुला खेल मैदानमा सञ्चालन हुनेछन् । प्रतियोगितामा जम्मा १० टोली सहभागी हुनेछन् भने कुल १५ खेल खेलाइनेछ, जसमध्ये पाँच खेल छात्रातर्फका रहने आयोजकले जनाएको छ । मुख्य प्रायोजक लहान मेरी चिल्ड्रेन एकेडेमी स्कूलका प्रबन्धक आयुश हमाल ठकुरीले प्रतियोगिताको सम्पूर्ण तयारी पूरा भइसकेको जानकारी दिए ।

उनले आठ वर्षपछि सञ्चालन हुन लागेको यस प्रतियोगिताले बालबालिकाको खेल प्रतिभा उजागर गर्न महत्त्वपूर्ण भूमिका खेल्ने विश्वास व्यक्त गरे । विद्यालय फुटबल संघका पूर्वाञ्चल अध्यक्ष तथा राष्ट्रिय ह्यान्डबल संघका पूर्वकेन्द्रीय सदस्य पाण्डव हमाल ठकुरीले प्रतियोगिताले जिल्लाको खेल विकासमा टेवा पुग्ने विश्वास व्यक्त गरे ।