तिलाठी कोइलाडीमा सरस्वती पूजनोत्सवको तयारी

सप्तरी । सप्तरीको तिलाठी कोइलाडी गाउँपालिका–१, तिलाठी गाउँमा दशकौंदेखि चल्दै आएको सरस्वती पूजनोत्सवको तयारी तीव्र बनाइएको छ । पाँच दिवसीय सरस्वती पूजनोत्सव यस वर्ष वसन्त पञ्चमीका दिन माघ ९ गते सुरु भएर १३ गतेसम्म चल्नेछ । पूजा तथा मेलाको लागि स्थानीयले तयारी थालेका छन् । मूर्ती निर्माणदेखि तथा स्टलको व्यवस्थापनको काम धमाधाम भइरहेको पूजा तथा मेला समितिका अध्यक्ष सुनिल मिश्रले जनाए ।

मेलामा हुने सम्पूर्ण खर्च गाउँलेहरूले आफैले जुटाउने गरेको उनी बताउँछन् । ‘अबको एक हप्तामा सबै काम सक्ने योजना छ,’ पूजा तथा मेला समितिका अध्यक्ष मिश्रले बताए ।

पूजा सुरु भएदेखि स्थानीय विद्यार्थीहरूद्वारा गरिने नाट्य मञ्चन मेलाको एक विशेषता हो । नाट्य मञ्चन गर्ने उद्देश्यले गाउँमा दुईवटा नाट्य परिषद् स्थापना गरिएका छन् । २००१ सालमा स्थापित सरस्वती सांस्कृतिक नाट्यकला परिषद् तथा २०३६ सालमा स्थापित हरगौरी नाट्यकला परिषद्ले मेलाको लागि एकमहिना अघिदेखि नै नाटक मञ्चनको तयारी थाल्छन् । यस वर्ष पनि दुवै परिषद्ले दुई/दुई दिन नाटक मञ्चन गर्न विद्यार्थीहरूलाई अभ्यास गराइरहेको सरस्वती सांस्कृतिक नाट्यकला परिषद्का निर्देशक अखिलेश्वर झाले बताए ।

मेलाको अर्को आकर्षण अन्तर्राष्ट्रिय कुस्ती प्रदर्शनी हो । जसमा नेपाल र भारतका पहलमानबिच प्रतियोगिता हुने गर्छ । कुस्ती हेर्न हजारौं मानिस आउने गर्छन् । यस वर्ष पनि तीन दिने कुस्ती प्रतियोगिता हुने तय भएको छ । यसअतिरिक्त विभिन्न सांस्कृतिक कार्यक्रम, आरती कार्यक्रम तथा जिल्ला स्तरीय नृत्य प्रतियोगिता पनि सञ्चालन गरिनेछ । मेलामा कुल १५ लाख खर्च हुने अनुमान छ । गाउँलेकै आर्थिक सहयोगले हुने गरेको पूजामा उत्साहजनक सहभागिता भइरहेको कोषाध्यक्ष रविकेशव मिश्र बताउँछन् । मेलालाई पर्यटकीय अवसरको रुपमा प्रयोग गर्न ध्यान नदिएको मेला समितिका सचिव अनुप झाको गुनासो छ ।