नेप्से परिसूचकमा झिनो अंकको सुधार

काठमाडौं । शेयरबजरमा बुधबार समान्य अंकले बढेको छ । कारोबार मापक नेप्से परिसूचक १.५२ अंकले बढेर २,६४१.४३ विन्दुमा कायम भएको हो । कारोबार रकम भने मंगलबारको तुलनामा घटेको छ । मंगलबार ६ अर्ब ९९ करोडको कारोबार भएकामा बुधबार ६ अर्ब २० करोडको कारोबार भयो । कुल १ करोड २५ लाख ४ हजार ९७० कित्ता शेयर किनबेच भएको छ ।

कारोबार भएका २६० कम्पनीमध्ये १२५ वटाको शेयरमूल्य बढेको छ भने १२४ वटाको घटेको छ । बाँकी ११ वटाको स्थिर रहेको छ । सूचीकृत १३ समूहमध्ये ८ वटा समूह बढेका छन भने ५ वटा घटेका छन् । लगानीकर्ताको आकर्षण फाइनान्स समूहमा धेरै देखियो । यो समूह २.५५ प्रतिशत बढेको छ । कारोबारमा आएका १५ वटै फाइनान्स कम्पनीको शेयरमूल्य बढेको छ ।

विकास बैंक, होटल तथा पर्यटन, जलविद्युत, लगानी, म्युचुअल फण्ड, निर्जीवन बीमा र व्यापार समूह बढेका छन् । बैंकिङ, जीवन बीमा, उत्पादन तथा प्रशोधन, लघुवित्त र अन्य समूह घटेका छन् ।

सुपर मादी हाइड्रोपावर लिमिटेडको शेयर मूल्य सर्वाधिक ९.९४ प्रतिशतले बढेको छ । त्यस्तै, थ्रि स्टार हाइड्रोपावरको शेयरमूल्य ८.२३ प्रतिशत बढेको छ । सबैभन्दा बढी आइसिएफसी फाइनान्स लिमिटेड डिबेन्चर–२०८८को इकाइ मूल्य ३.३० प्रतिशत घटेको छ ।

कारोबार रकमका आधारमा सबैभन्दा बढी राधी विद्युत् कम्पनी लिमिटेडको २६ करोड २४ लाख चार हजार १८४ रुपैयाा बराबरको कारोबार भएको छ । कारोबार भएका शेयर संख्याका आधारमा दोर्दीखोला जलविद्युत् कम्पनी लिमिटेडको सबैभन्दा बढी ६ लाख ७१ हजार ११८ कित्ता शेयर खरिदबिक्री भएको छ ।

यसदिन लगानीकर्ताको सम्पत्ति ३ अर्ब रुपैयाँ बढेको छ । बजार पुँजीकरण ४४ खर्ब ३५ अर्ब रुपैयाँ कायम भएको छ । साधारण शेयरतर्फको बजार पुँजीकरण भने १५ खर्ब ६ अर्ब रुपैयाँमा स्थिर रहेको छ ।