सात महिनामा साढे ९ खर्ब व्यापार घाटा

काठमाडौं । नेपालले सात महिनामा साढे ९ खर्ब व्यापार घाटा व्यहोरेको छ । चालु आर्थिक वर्ष २०८२÷८३ को साउनदेखि माघसम्ममा नेपालले ११ खर्ब २३ अर्बको आयात गर्दा एक खर्ब ६८ अर्ब रुपैयाँको मात्र निर्यात गरेको हो ।
गत आवको सोही अवधिको तुलनामा निर्यात १३.६५ प्रतिशत बढेको छ । गत आवको पहिलो सात महिनामा ९ खर्ब ३९ अर्बको आयात भएको थियो । माघ महिनामा मात्रै एक खर्ब ८४ अर्ब रुपैयाँको आयात भएको छ । 
सात महिनामा निर्यात ३२ प्रतिशतले बढेर एक खर्ब ६८ अर्ब रुपैयाँ पुगेको छ । गत आवको सोही अवधिमा एक खर्ब २७ अर्ब रुपैयाँको निर्यात भएको थियो । चालु आवको माघ महिनामा मात्रै २६ अर्ब १२ करोड रुपैयाँको निर्यात भएको भन्सार विभागको तथ्यांकले देखाउँछ ।
समीक्षा अवधिमा नेपालले १२ खर्ब ९१ अर्ब ६३ करोड रुपैयाँबराबरको वैदेशिक व्यापार गरेको छ । गत वर्षको सोही अवधिमा ११ खर्ब १५ अर्ब ७९ करोडको व्यापार गरेको थियो । समीक्षा अवधिलाई तुलना गर्दा वैदेशिक व्यापार १५.७६ प्रतिशत बढेको हो । कुल वैदेशिक व्यापारमा निर्यात हिस्सा १३.०२ प्रतिशत छ भने आयात हिस्सा ८६.९८ प्रतिशत छ ।
यो अवधिमा सबैभन्दा धेरै वीरगञ्ज नाकाबाट ५ खर्ब १९ अर्बको आयात भएको छ भने ५७ अर्ब ७३ करोड रुपैयाँको निर्यात भएको छ । त्यस्तै त्रिभुवन अन्तर्राष्ट्रिय विमानस्थलबाट १ खर्ब २६ अर्ब २५ करोडको आयात भएको छ भने २१ खर्ब २७ अर्बको निर्यात भएको छ ।
नेपालमा २८ भन्सार कार्यालयबाट वैदेशिक व्यापार हुँदै आएको छ । तीमध्ये ११ भन्सार कार्यालयले आयात व्यापारमात्र गर्छन् । चीनसँगको मुख्य नाका तातोपानीबाट समेत सात महिनामा २६ अर्ब २७ करोड रुपैयाँको आयात व्यापार हुँदा निर्यात हिस्सा शून्य छ ।

१३ अर्ब ८४ करोडको ईभी आयात
सात महिनामा १३ अर्ब ८४ करोड ७७ लाख रुपैयाँबराबरको विद्युतीय सवारी साधन (ईभी) आयात भएको छ । समीक्षा अवधिमा ५० किलोवाटसम्मका १ हजार ९९२ वटा, ५१ देखि १०० किलोवाटसम्मका ३ हजार ४०२ वटा, १०१ देखि २०० किलोवाटसम्मका ४९३ वटा र २०१ देखि ३०० किलोवाटसम्मका ७ वटा गरी ५ हजार ८९४ वटा ईभी आयात भएका हुन् ।
ईभी आयात गत आवको सोही अवधिको भन्दा कम हो । गत आवको साउनदेखि माघसम्ममा १४ अर्ब ७५ करोड ३ लाख ९७ हजार मूल्यका ६ हजार २५६ वटा ईभी आयात भएको थियो । भन्सार विभागको तथ्यांकअनुसार ईभी आयातबाट सात महिनामा सरकारले ८ अर्ब ४६ करोड १९ लाख रुपैयाँ राजस्व प्राप्त गरेको छ ।
समीक्षा अवधिमा चीनबाट ४ हजार २०२ वटा, भारतबाट १ हजार २६३ वटा, थाइल्यान्डबाट ४०१ वटा, अमेरिकाबाट १२ वटा, जर्मनीबाट १० वटा, कोरियाबाट २ वटा तथा अस्ट्रिया र बेलायतबाट १–१ वटा ईभी आयात भएको विभागले जनाएको छ ।