यन्त्रमेधा चलचित्र चीनमा अस्वीकृत

टेलिभिजनमा सित्तैमा हेर्न पाइने कुरा हलमा पैसा तिरेर हेरिँदैन भन्ने पुरानो भनाइ अहिले चीनमा यन्त्रमेधा (एआई) बाट बनेका चलचित्रमा पनि लागू भएको छ । चीनको सिनेमा हलमा प्रदर्शन अनुमति पाउने पहिलो पूर्ण एआई निर्मित चलचित्र ‘सान्सिङदुई ः फ्युचर पास्ट’ बक्स अफिसमा नराम्ररी असफल भएको छ ।
बोना फिल्म ग्रुपले करिब १५ लाख अमेरिकी डलर लगानीमा बनाएको यो चलचित्रले जम्मा १ लाख ८१ हजार डलर मात्र कमाउन सक्यो । २० करोड पटक हेरिएको एआई छोटो शृंखलामा आधारित भए पनि यसले हलमा दर्शक तान्न सकेन । एआईले सजिलै चलचित्र बन्छ भन्ने आम बुझाइविपरीत, ७० देखि ८० जनाको टोलीले दुई वर्ष लगाएर यो चलचित्र तयार पारेको थियो । यति मेहनतका बाबजुद पर्दामा यसको गुणस्तर कमजोर देखिएको र दर्शकले हलमै गएर पैसा तिर्न लायक नभएको प्रतिक्रिया दिएका छन् ।
यसैबीच, अमेरिकामा पनि पूर्ण रूपमा एआईबाटै बनेको चलचित्र ‘गड्स डोन्ट गिभ गिफ्ट्स’ आगामी डिसेम्बरमा प्रदर्शन हुँदैछ । युट्युबर गसिप गोब्लिनले बनाएको यो चलचित्र मोसन पिक्चर एसोसिएसन (एमपीए) बाट वर्गीकरण पाउने पहिलो एआई चलचित्र हो र यसलाई ओस्कार दौडमा समेत लैजाने तयारी छ ।
चीन र अमेरिका जहाँ भए पनि, दर्शकहरू सिनेमा हलमा जाँदा घरमा सित्तैमा हेरिने सामग्रीभन्दा निकै उच्च स्तरको कलात्मक अनुभव चाहन्छन् । चिनियाँ चलचित्रको यो निराशाजनक व्यापारले भविष्यमा एआई चलचित्रहरूले दर्शकलाई हलसम्म तान्न कत्तिको सफलता पाउँछन् भन्ने गम्भीर प्रश्न खडा गरेको छ ।