हुलास फिनसर्भ आइपीओ ल्याउने प्रक्रियामा

काठमाडौं । हायर पर्चेज कम्पनी हुलास फिनसर्भले प्राथमिक सार्वजनिक निष्कासन (आइपीओ) जारी गर्ने भएको छ । प्रिमियम मूल्यमा आइपीओ ल्याउन अनुमति माग्दै पेस गरेको आवेदन नेपाल धितोपत्र बोर्डमा सूचीकृत भएको छ । 
कम्पनीको गत मंसिर १२ गते सम्पन्न वार्षिक साधारण सभाले आइपीओ जारी गर्ने प्रस्ताव अनुमोदन गरेको थियो । सोही निर्णयअनुसार कम्पनीले सेबोनमा निवेदन पेस गरेको जनाएको छ । बोर्डले बुधबार सार्वजनिक गरेको आइपीओ पाइपलाइन सूचीमा कम्पनीको आवेदन ‘अदर’ वर्गअन्तर्गत सूचीकृत भएको छ । कम्पनीले बिहीबार विज्ञप्तिमार्फत आइपीओ ल्याउने प्रक्रिया अघि बढेको जनाएको हो ।
हुलास फिनसर्भ हायर पर्चेज लिमिटेड नेपाल राष्ट्र बैंकबाट इजाजतपत्र प्राप्त हायर पर्चेज कम्पनी हो । कम्पनीले २० लाख ७५ हजार कित्ता शेयर प्रति कित्ता रु. ३५८.८५ का दरले प्रिमियम मूल्यमा निष्कासन गर्ने प्रस्तावसहित आवेदन दिएको छ ।
आइपीओ निष्कासन तथा बिक्री प्रबन्धकका रूपमा कम्पनीले एनएमबि क्यापिटल लिमिटेडलाई नियुक्त गरिसकेको छ । कम्पनीको आइपीओ प्रस्ताव सेबोनको स्वीकृतिपछि सार्वजनिक निष्कासन प्रक्रिया अघि बढ्नेछ ।