पूर्वसांसद कोइरीलाई रिहा आदेश

काठमाडौं । सर्वोच्च अदालतले एमालेका पूर्वसांसद लक्ष्मी कोइरी महतोलाई रिहा गर्न आदेश दिएको छ । बन्दी प्रत्यक्षीकरणको रिटमाथि बिहीबार सुनुवाइ गर्दै न्यायाधीशहरू कुमार रेग्मी र श्रीकान्त पौडेलको इजलासले रिहा गर्न आदेश दिएको हो । 
उच्च अदालतले सशस्त्र प्रहरीका थमन विक हत्या अभियोगमा दोषी ठहर गर्दै ५ वर्ष कैद सजाय सुनाएपछि असार १९ मा उनलाई पक्राउ गरिएको थियो । 
उक्त पक्राउविरुद्ध उनका छोरा मनोजकुमारले बन्दी प्रत्यक्षीकरणको रिट दायर गरेका थिए । उक्त रिटमा आदेश गर्दै सर्वोच्चले भनेको छ, ‘... असार १८ मा जारी भएको पक्राउ पुर्जी र सोही आधारमा जारी भएको असार १९ गतेको कैदी पुर्जी कानूनसम्मतको रहेको नदेखिएको हुँदा उत्प्रेषण आदेशले बदर गरी अन्य मुद्दाबाट थुनामा राख्न नपर्ने भए आजै निवेदकलाई थुनामुक्त गर्नु भनी बन्दी प्रत्यक्षीकरणको आदेश जारी गरिदिएको छ ।’
०७२ भदौ २५ गते मधेश आन्दोलनका क्रममा महोत्तरीको जलेश्वरमा भएको थमन विकको हत्यामा जिल्ला अदालत महोत्तरीले उनलाई सफाइ दिएको थियो । तर, असार १७ गते उच्च अदालत जनकपुरले उनलाई ५ वर्ष कैद सजाय सुनाएको थियो ।
सर्वोच्चले पुनरावेदन गर्न पाउने समय बाँकी रहँदा नै कोइरीलाई दिएको पक्राउ पुर्जी र कैदी पुर्जी कानुन सम्मत नदेखिएको आदेश गरेको हो । प्रहरीले असार १८ गते उनलाई जरूरी पक्राउ पुर्जीको आधारमा अनुसन्धान गर्न भनेर पक्राउ गरेको देखिएको छ । पक्राउ पुर्जीले फैसला कार्यान्वयनको सिलसिलामा नभई ज्यान सम्बन्धी कसुरको अनुसन्धानको सिलसिलामा पक्राउ गरेको देखिएको सर्वोच्चले जनाएको छ ।
तर के कुन घटना र कसुर हो भन्ने मिसिलमा नदेखिएकाले पक्राउ पुर्जी नै गैरकानुनी रहेको सर्वोच्चकोे ठहर छ ।