सरकारी जग्गा किर्तेमा साढे ४ करोडको मुद्दा

काठमाडौं । गलत लिखत एवं सरकारी कागजात सच्याई भ्रष्टाचार गरेको आरोपमा भैरहवाको मालपोत कार्यालय रुपन्देहीका तत्कालीन प्रमुख मालपोत अधिकृत कुमार आचार्यसहित ५ जनाविरुद्ध विशेष अदालतमा भ्रष्टाचार मुद्दा दायर भएको छ ।
सरकारी सम्पत्ति हिनामिना गरेको ठहर गर्दै अख्तियार दुरुपयोग अनुसन्धान आयोगले तत्कालीन प्रमुख मालपोत अधिकृत आचार्य, तत्कालीन नासु लक्ष्मणप्रसाद न्यौपाने, अजितकुमार सहनी, खरिदार मेघबहादुर भुजेल र जग्गाधनी पर्वतराज कान्त मिश्रविरुद्ध बुधबार मुद्दा दायर गरेको हो । मुद्दामा  प्रतिवादीहरूविरुद्ध जनही ४ करोड ५३ लाख ४१ हजार ८ सय रुपैयाँ बिगो कायम गरी सजाय र बिगो असुलउपरको मागदाबीसहित आरोपपत्र दायर गरिएको आयोगले जनाएको छ ।
आयोगका अनुसार तत्कालीन समयमा भूमिसम्बन्धी ऐनअनुसार हदबन्दीमा परेपछि तत्कालीन जग्गाधनी स्व. सुर्जा मिश्राइनले रुपन्देही साबिक भुजौली ९ (ख) का विभिन्न कित्ता नम्बरका जग्गा कालीजी मन्दिरलाई दान दिएकी थिइन् । हदबन्दी लागेर सार्वजनिक भइसकेको उक्त जग्गा पछि जुनसुकै बेहोराले दर्ता गराए पनि स्वतः बदरभागी हुने कानुनी व्यवस्थाविपरीत आपसी मिलेमतो र गलत लिखत खडा गरी व्यक्तिको नाममा दर्ता गराएको पाइएको हो ।