वीरगन्जबाट सात महिनामा ५ खर्बको सामान आयात

पर्सा । वीरगन्ज नाका हुँदै चालु आर्थिक वर्ष २०८२÷८३ को सात महिनामा ५ खर्ब १९ अर्ब एक करोड रुपैयाँबराबरका वस्तु तथा सामान आयात भएको छ । गत आर्थिक वर्ष २०८१÷८२ को सोही अवधिको तुलनामा चालु आवमा ५७ अर्ब ३१ करोड अर्थात् १२ प्रतिशत बढी सामान आयात भएको हो ।
वीरगन्ज भन्सार कार्यालयका सूचना अधिकारी उदयसिंह विष्टले चालु आवमा आयातमा उल्लेखनीय वृद्धि भएको बताए । ‘चालु आवमा पेट्रोलियम पदार्थ र फलाम तथा फलामबाट बनेका सामानहरुको आयातको हिस्सा बढी देखिन्छ,’ उनले भने । गत आवको पहिलो सात महिनामा चार खर्ब ६० अर्ब २३ करोड मूल्यको सामान आयात भएको थियो ।
चालु आवको सात महिनामा एक खर्ब ६ अर्ब ४३ करोड मूल्य पर्ने पेट्रोलियम पदार्थको आयात गरिएको छ । त्यसैगरी, ४६ अर्ब १६ करोड मूल्य पर्ने फलाम तथा फलामबाट बनेका सामानको आयात भएको छ । सोही अवधिमा ३५ अर्ब ८७ करोड मूल्य पर्ने मेसिनरी तथा पार्टपुर्जा आयात गरिएको छ ।
त्यस्तै ३५ अर्ब ६७ करोड मूल्य पर्ने भटमासको कच्चा तेल आयात भएको छ भने २७ अर्ब ९८ करोड मूल्य पर्ने इलेक्ट्रिक मेसिनरी, उपकरण र तिनका पार्टपुर्जाको आयात भएको भन्सार कार्यालयले जनाएको छ ।