मतदानपछि उद्योगी व्यवसायीले के भने ?

चन्द्रप्रसाद ढकाल
अध्यक्ष, नेपाल उद्योग वाणिज्य महासंघ
मत भनेको केवल अधिकारमात्र होइन, देशको भविष्य निर्धारण गर्ने जिम्मेवारी पनि हो । मतदानमार्फत मुलुकले सक्षम र दूरदर्शी नेतृत्व पाओस्, जसले स्थिर नीति, लगानीमैत्री वातावरण र निजी क्षेत्रको सहभागितासहित समृद्ध अर्थतन्त्र निर्माणतर्फ मुलुकलाई अघि बढाओस् भन्ने अपेक्षा गरेको छु । यो निजी क्षेत्र मात्र होइन, आम नेपालीको अपेक्षा पनि हो ।
मुलुकको अर्थतन्त्र, रोजगारी र राजस्वमा ८० प्रतिशतभन्दा बढी योगदान दिने निजी क्षेत्र नै विकास र समृद्धिको प्रमुख संवाहक हो । निजी क्षेत्रको सक्रिय सहभागिता र लगानीबाट मात्रै मुलुकमा अपेक्षित विकास र समृद्धि हासिल हुन सक्छ । निर्वाचनपछि बन्ने नयाँ सरकार र नेतृत्वले निजी क्षेत्रको यस महत्वलाई मनन गर्दै निजी क्षेत्र सँगको सहकार्यलाई अझ सुदृढ र प्रभावकारी बनाउने विश्वास छ ।

भवानी राणा
पूर्वअध्यक्ष, नेपाल उद्योग वाणिज्य महासंघ
हाम्रो नेपालको भविष्य र आर्थिक समृद्धि निर्धारण गर्ने यस महत्वपूर्ण अवसरमा यहाँहरूले पनि आफ्नो अमूल्य मत प्रयोग गर्नुभएको छ भन्ने विश्वास लिएकी छु । आज हामीले गरेको निर्णयले भोलिको नेपालको आर्थिक दिशा, रोजगारीका अवसर, विकासको गति र समृद्धिको मार्ग तय गर्नेछ ।

अन्जन श्रेष्ठ
वरिष्ठ उपाध्यक्ष, नेपाल उद्योग वाणिज्य महासंघ
परिवर्तन, रूपान्तरण, पुस्तान्तरण र हस्तान्तरणको अभियानलाई सार्थक बनाउन साथै देशलाई समृद्ध, सुशासन र समुन्नतिको पहलकदमीमा सहभागी भएको क्षण ।

कमलेशकुमार अग्रवाल
अध्यक्ष, नेपाल चेम्बर अफ कमर्स
मेरो मत परिवर्तन, पारदर्शिता र प्रगतिका लागि । मेरो मत केवल नेतृत्वका लागि होइन, समृद्ध र आत्मनिर्भर नेपालको सपनाका लागि हो ।

राजेन्द्र मल्ल
उद्योगी एवं पूर्वअध्यक्ष, नेपाल चेम्बर अफ कमर्स
हामीले आफ्नो अमूल्य मत खसाल्यौँ । लोकतन्त्रलाई बलियो बनाउने र देशको उज्ज्वल भविष्य निर्माण गर्ने आधार नै जनताको मत हो । जिम्मेवार नागरिकको रूपमा आफ्नो अधिकार प्रयोग गर्दै मतदान गर्नु हाम्रो कर्तव्य र गर्वको विषय हो । सबैले सचेत भएर मताधिकार प्रयोग गरौँ र समृद्ध राष्ट्र निर्माणमा योगदान दिऔँ ।

पशुपतिदेव पाण्डे
अध्यक्ष, नेपाल तयारी पोसाक उद्योग संघ
प्रतिनिधि सभा निर्वाचनमा सहभागी भई आफ्नो अमूल्य मताधिकार प्रयोग गरेँ । लोकतन्त्रलाई बलियो बनाउन मतदान गर्नु हाम्रो अधिकार र कर्तव्य हो । जय देश !

गणेश कार्की
अध्यक्ष, स्वतन्त्र ऊर्जा उत्पादकहरुको संस्था नेपाल, इप्पान
हामीले मताधिकार प्रयोग ग¥यौं । देशको समृद्धिको आधारशीला बनोस् यो निर्वाचन ।