कामै नगरी भुक्तानी, अख्तियारको डरले अहिले काम धमाधम

सप्तरी, १६ भदौ - सप्तरीको तिलाठी कोइलाडी गाउँपालिका–५, कुशहामा रहेको राष्ट्रिय प्राथमिक विद्यालयको बाउन्ड्री वाल तथा गेट निर्माणका लागि विनियोजित रकम काम नगरीकनै भुक्तानी गरिएको खुलासा भएको छ । प्रदेश सरकारबाट गत आर्थिक वर्षमा छुट्याइएको २५ लाख रुपैयाँमध्ये अधिकांश रकम उपभोक्ता समितिलाई दिइसकिएको छ, तर निर्माण कार्य भने अझै अपुरो छ ।

शिक्षा विकास इकाइ सप्तरीमार्फत उपभोक्ता समितिसँग सम्झौता गरी निर्माण कार्य थालिएको भए पनि गत आर्थिक वर्षमै काम सम्पन्न हुनुपर्ने थियो । तर, गेट निर्माण, वाल प्लास्टर र वालको छेउमा वालुवा पुर्नेजस्ता काम अझै अधुरा रहेका छन् । हाल अख्तियार दुरुपयोग अनुसन्धान आयोगको डरले निर्माण कार्य धमाधम भइरहेको देखिएको छ ।

स्थानीय बासिन्दा जीवछ साहका अनुसार, ‘बर्खाको कारणले काम ढिलो भएको बहानामा अहिले बल्ल बालुवा ल्याउने, गेट बनाउने काम गरिँदैछ ।’ अर्का स्थानीय मनिष साहले उपभोक्ता समिति र साइड इन्जिनियरसँग बारम्बार इस्टिमेट माग्दा पनि नपाएको गुनासो गरे ।

‘पैसा काम नगरी नै लिइएको हो, अख्तियारमा उजुरी हुने थाहा पाएपछि मात्रै काम थालेका हुन्,’ उनले भने ।

उपभोक्ता समितिका अध्यक्ष उमाशंकर सिंहले विभिन्न प्राविधिक कारणले ढिलाइ भएको स्वीकार गर्दै अहिलेसम्म १७–१८ लाख मात्र भुक्तानी लिएको दाबी गरे । बाँकी रकम पाउने आशमा अहिले काम सुरु गरेको उनको भनाइ छ ।

यसबारेमा शिक्षा विकास इकाइ सप्तरीका प्रमुख राम हृदय यादवले आफू कार्यालयबाहिर भएकोले सटिक जानकारी नभएको बताए । ‘काम भइरहेको छ भने मलाई थाहा छैन, तर कामअनुसार नै भुक्तानी हुने हो,’ उनले प्रतिक्रिया दिए ।

यस्तै, सो निर्माण कार्य मूल्यांकन गर्ने इन्जिनियर योगेन्द्र यादवले अडिट नहुञ्जेल कामको खर्च र स्थिति बारे बताउन नसकिने बताए । ‘काम भइसकेको भन्ने रिपोर्ट छ । तर, अहिले किन पुनः काम हुँदैछ भन्नेबारे थाहा छैन,’ उनले भने ।

स्थानीयले भने यस घटनालाई सरकारी रकमको दुरुपयोग र योजनाको नाममा हुने चलखेलको स्पष्ट उदाहरणका रूपमा लिएका छन् ।