सन नेपाल लाइफको अभिकर्ता सशक्तीकरण

काठमाडौं । सन नेपाल लाइफ इन्स्योरेन्स कम्पनीले अभिकर्ताको क्षमता अभिवृद्धि, उत्प्रेरणा र सम्मानको उद्देश्यले ‘प्रयत्न निरन्तर सम्मान र सबलीकरणको अवसर’ शीर्षकमा एक दिने विशेष कार्यक्रम आयोजना गरेको छ । लुम्बिनी र कर्णाली प्रदेशका अभिकर्तालाई लक्षित गरी आयोजना गरिएको कार्यक्रममा १७० भन्दा बढी बीमा सल्लाहकारहरूको सहभागिता थियो ।
कार्यक्रममा अन्तर्राष्ट्रिय मोटिभेसनल स्पिकर विजय झाको प्रशिक्षण सत्र मुख्य आकर्षणको रूपमा रहेको थियो । उनले बिक्री कला, लक्ष्य निर्धारण, आत्मविश्वास विकास तथा बदलिँदो बीमा बजारमा सफल हुन अपनाउनुपर्ने रणनीतिबारे प्रभावकारी प्रशिक्षण दिए ।
कार्यक्रममा निमित्त प्रमुख कार्यकारी अधिकृत कवि फुयाल, प्रमुख बजार अधिकृत गणेश चौलागाईंलगायत विभिन्न पदाधिकारीहरूको उपस्थिति थियो । फुयालले अभिकर्तालाई कम्पनीको मेरुदण्ड भएको उल्लेख गर्दै उनीहरूको सशक्तीकरण नै कम्पनीको दीर्घकालीन सफलताको आधार भएको बताए ।
त्यसैगरी प्रमुख बजार अधिकृत गणेश चौलागाईंले अभिकर्तालाई निरन्तर सिकाइ, अनुशासन तथा ग्राहकप्रति जिम्मेवार दृष्टिकोणसहित अघि बढ्न आग्रह गर्दै यस्ता कार्यक्रमले बजार प्रतिस्पर्धामा अग्रता दिलाउने विश्वास व्यक्त गरे ।
कार्यक्रमका क्रममा उत्कृष्ट कार्यसम्पादन गर्ने अभिकर्तालाई सम्मान गरिएको थियो । विशेषगरी कार्यक्रममा सहभागीमध्ये आफ्नो शाखाअन्तर्गत उत्कृष्ट व्यापार गर्न सफल ७ जना अभिकर्तालाई उत्कृष्ट अभिकर्ताका रूपमा सम्मान गरिएको हो ।
कम्पनीले यस्ता कार्यक्रममार्फत अभिकर्ताको दक्षता अभिवृद्धि गर्दै देशभर बीमा सेवाको पहुँच विस्तार गर्ने लक्ष्य लिएको जनाएको छ । सन नेपाल लाइफ इन्स्योरेन्सका देशभर १४८ शाखा तथा उपशाखा छन् ।