सञ्चार गृहमा प्रहरी प्रवेश र हस्तक्षेपप्रति मिडिया एलाइन्स नेपालको आपत्ति

काठमाडौं । सञ्चार गृहमा प्रहरी प्रवेश तथा सञ्चार संस्थाको व्यावसायिक र सम्पादकीय कार्यक्षेत्रमा हुन सक्ने हस्तक्षेपप्रति मिडिया एलाइन्स नेपालले गम्भीर आपत्ति जनाएको छ । एलाइन्सले शनिबार प्रेस विज्ञप्ति जारी गर्दै सञ्चार गृहमा कानुनी आधार र निर्धारित प्रक्रियाबिना प्रवेश गर्ने, सञ्चारकर्मीलाई त्रसित पार्ने तथा समाचार संकलन, सम्पादन र प्रसारणमा अवरोध सिर्जना गर्ने कार्य अस्वीकार्य रहेको जनाएको हो । 
सञ्चार गृह नागरिकको सूचनाको हक सुनिश्चित गर्ने, लोकतान्त्रिक मूल्य–मान्यताको रक्षा गर्ने र राज्यका गतिविधिमाथि निगरानी राख्ने सार्वजनिक उत्तरदायित्व बोकेको संस्था भएकाले यसको सम्पादकीय स्वतन्त्रता र संस्थागत स्वायत्तताको सम्मान गर्नुपर्ने एलाइन्सको भनाइ छ । कानुन कार्यान्वयन गर्ने प्रहरी प्रशासनसमेत प्रचलित कानुन, संवैधानिक व्यवस्था र प्रेस स्वतन्त्रताका आधारभूत मान्यताभित्र रहेर परिचालित हुनुपर्ने विज्ञप्तिमा उल्लेख छ । अनुसन्धान वा कानुनी कारबाही आवश्यक भए निर्धारित प्रक्रिया अवलम्बन गर्नुपर्ने भन्दै एलाइन्सले कानुन कार्यान्वयनको नाममा प्रेस तथा अभिव्यक्ति स्वतन्त्रता संकुचित गर्न नहुने स्पष्ट पारेको छ ।
एलाइन्सले सञ्चार गृहमा प्रहरी प्रवेश तथा अनुसन्धानका क्रममा कानुनी प्रक्रियाको पूर्ण पालना गर्न, सम्पादकीय स्वतन्त्रता र संस्थागत स्वायत्ततामाथिको हस्तक्षेप रोक्न तथा सञ्चारकर्मीको पेसागत सुरक्षा सुनिश्चित गर्न सरकार, गृह मन्त्रालय र प्रहरी प्रशासनसँग माग गरेको छ ।

त्यस्तै, सञ्चार गृहमा भएको घटनाको निष्पक्ष छानबिन गरी आवश्यक कानुनी तथा संस्थागत जवाफदेहिता सुनिश्चित गर्न पनि माग गरिएको छ।
‘लोकतन्त्रमा स्वतन्त्र प्रेस राज्यको प्रतिपक्ष मात्र होइन, नागरिकको आवाज र सार्वजनिक जवाफदेहिताको महŒवपूर्ण आधार पनि हो,’ विज्ञप्तिमा भनिएको छ, ‘सञ्चार गृहलाई भय, दबाब र हस्तक्षेपमुक्त राख्नु राज्यको संवैधानिक तथा लोकतान्त्रिक दायित्व हो ।’ प्रेस स्वतन्त्रताको रक्षा सञ्चार क्षेत्रको मात्र नभई समग्र लोकतन्त्रकै साझा दायित्व भएको एलाइन्सको विज्ञप्तिमा उल्लेख छ ।