नेपाल–भारत विदेश सचिवस्तरीय बैठक

काठमाडौं । नेपाल र भारतका विदेश सचिवस्तरीय द्विपक्षीय बैठक भएको छ । परराष्ट्रसचिव अमृतबहादुर राई र भारतका विदेश सचिव विक्रम मिश्रीबीच प्रतिनिधिमण्डलस्तरीय बैठक बुधबार काठमाडौंमा भएको हो । द्विपक्षीय सम्बन्धलाई थप प्रगाढ र फलदायी बनाउने विभिन्न विषयमा छलफल भएको मन्त्रालयले जनाएको छ ।
बैठकमा आगामी उच्चस्तरीय भ्रमणको तयारी, हवाई, रेल, सडक तथा पुललगायतका पूर्वाधारमार्फत सम्पर्क सञ्जाल विस्तार र सुदृढीकरण तथा द्विपक्षीय व्यापार प्रवर्धन तथा सहजीकरणका विषयमा छलफल भएको मन्त्रालयका प्रवक्ता लोकबहादुर पौडेल क्षेत्रीले  जानकारी दिए । बैठकमा विकास सहकार्यलाई थप प्रभावकारिता बनाउने, ऊर्जा क्षेत्रमा विद्यमान सहकार्यलाई थप विस्तार र सुदृढीकरणका विषयमा छलफल भएको उनले बताए  । बैठकमा द्विपक्षीय सम्बन्धका समग्र आयामहरूमा छलफल भएको थियो ।
परराष्ट्रसचिव राईको मैत्रीपूर्ण निमन्त्रणामा विदेश सचिव मिश्री नेपालको दुई दिने औपचारिक भ्रमणका लागि बुधबारै आइपुगेका हुन् । पहिलो दिन सचिव मिश्रीले अर्थमन्त्री डा. स्वर्णिम वाग्ले, परराष्ट्रमन्त्री शिशिर खनाल, ऊर्जा जलस्रोत तथा सिँचाइमन्त्री विराज भक्त श्रेष्ठ र पूर्वाधार मन्त्री सुनिल लम्सालसँग छुट्टाछुट्टै शिष्टाचार भेट गरेका छन् । बिहीबार बिहान प्रधानमन्त्री वालेन्द्र शाहसँग शिष्टाचार भेट गर्ने र नयाँदिल्ली फिर्ता हुने तालिका छ ।