साहित्यकार खगेन्द्र गिरीको ‘भग्न प्रेमशाला’ बजारमा

साहित्यकार खगेन्द्र गिरीको पहिलो कथासंग्रह ‘भग्न प्रेमशाला’ हालै बजारमा आएको छ। इन्डिगो इन्कद्वारा प्रकाशित यस कथासंग्रहमा नौ वटा कथा समावेश छन्, जसमा लेखकले प्रयोगवादी शैलीमार्फत मानवीय संवेदना, सामाजिक द्वन्द्व र प्रेमका विविध रूपलाई प्रस्तुत गरेका छन् ।

गिरीको यस संग्रहमा दैनिक जीवनमा सामान्य लाग्ने पात्रहरूलाई अस्वाभाविक, डर लाग्दा र कहिलेकाहीँ खुंखार रूपले चित्रण गरिएको छ । ती पात्रहरूले जीवनमा घट्ने दुर्घटना, अपूर्णता र असफल प्रेमका कथाहरू बोकेका छन् । 

गिरीका कथामा देखिने पात्र र परिस्थिति पाठकलाई परिचित भए तापनि, स्वैरकल्पनाको प्रयोगले तिनलाई विलक्षण ढंगले पुनः सिर्जना गरिएको छ । 

लेखक स्वयं पत्रकारिता क्षेत्रमा सक्रिय भएकाले उनका कथामा सामाजिक यथार्थ र व्यंग्यात्मक प्रस्तुति सशक्त रूपमा आएको पाइन्छ । उनले वर्तमान समाजदेखि लिएर इतिहाससम्मका विकृति र विसङ्गतिलाई कथामा उठाएका छन् ।

आख्यानकार तथा निबन्धकार नारायण ढकालले गिरीको यस संग्रहबारे टिप्पणी गर्दै भनेका छन्, ‘गिरीले आफ्ना कथामा सामाजिक, आर्थिक, राजनीतिक र नैतिक सबै खालका संकटलाई विषयवस्तु बनाएका छन् । उनका कथा स्वैरकल्पनामा आधारित भए पनि त्यसलाई सतही रूपमा नभई गहिराइका साथ प्रस्तुत गरिएको छ ।’

प्रकाशक इन्डिगो इन्कका अनुसार पुस्तक चाँडै औपचारिक रूपमा विमोचन गरिने छ। ‘भग्न प्रेमशाला’ को मूल्य ५४९ रुपैयाँ तोकिएको छ । साहित्यिक वृत्तमा यस संग्रहलाई नयाँ पुस्ताका लेखकले प्रयोगवादी कथा लेखनमा गरेको साहसिक प्रयासका रूपमा हेरिएको छ । पाठक र समीक्षक दुवैको रुचि आकर्षित गर्ने अपेक्षा राखिएको यस पुस्तकले नेपाली कथासाहित्यमा नयाँ बहस सुरु गर्ने विश्वास गरिएको छ ।