‘असत्य समाचारले न्यायमा अवरोध’

काठमाडौं (संवाददाता) - सर्वोच्च अदालतले असत्य र भ्रामक समाचारले न्यायमा अवरोध पुग्ने भन्दै त्यस्तो अवस्थामा अदालतको अवहेलनाको कारबाही आकर्षित हुने चेतावनी दिएको छ ।

९ सदस्यीय बृहत् पूर्ण इजलासले ‘समग्र न्यायप्रणालीप्रति भ्रम र अनास्था पैदा गर्ने तथा अदालतको गरिमा र मर्यादामा आँच पुर्‍याउने’ सामग्रीलाई अवहेलनायोग्य ठहर गरेको हो । 

यसअघि सर्वोच्चले टिकाटिप्पणी र प्रकाशनबाट अवहेलनाको परम्परागत मान्यता उदार बनाउँदै आएको भए पनि सिधा कुरा अनलाइनद्वारा प्रसारित विवादास्पद समाचारपछि अदालत कठोर व्याख्यामा फर्किएको देखिन्छ ।

फैसलाको पूर्णपाठमा भनिएको छ, गलत समाचारले न्यायकर्मीलाई हतोत्साहित गरी न्याय सम्पादनमा अवरोध गर्छ, त्यसैले प्रेस स्वतन्त्रता अदालतको अवहेलनालाई परास्त गर्न सक्दैन ।

विशेषगरी विद्युतीय सञ्चारमाध्यमले समाचार प्रकाशनपूर्व सत्यता प्रमाणीकरण गर्नुपर्ने सर्वोच्चले औंल्याएको छ । अदालतले स्वस्थ आलोचनालाई स्वीकार्य माने पनि अदालतप्रति अविश्वास र भ्रम सिर्जना गर्ने गतिविधि सहन नसकिने स्पष्ट पारेको छ ।