संखुवासभा भोटे गुम्बा निर्माणका लागि प्रख्यात हिमाल आरोही मिङ्मा शेर्पाको ५ लाख सहयोग

काठमाडौँको गोकर्णेश्वर नगरपालिका वडा ३, बालुवामा निर्माण भइरहेको संखुवासभा भोटे गुम्बालाई समाजसेवी तथा प्रख्यात हिमाल आरोही मिङ्मा शेर्पाले ५ लाख रुपैयाँ सहयोग गरेका छन् । बुधवार गुम्बा परिसरमा एक कार्यक्रमका बीच शेर्पाले उक्त रकम सहयोग गरेका हुन् । गिनिज बुक अफ वर्ल्ड  रेकर्डर शेर्पाले गुम्बाको अवलोकन गर्दै संखुवासभा गुम्बा व्यवस्थापनका अध्यक्ष ताप्चेन भोटे लगायतका पदाधिकारीसँग निर्माणाधिन गुम्बाको जानकारी लिएका छन् । 

शेर्पा सेभेन समिट ट्रेकका अध्यक्ष समेत रहेका शेर्पाले आफुले थोरै थोरै बचत गर्दै जम्मा गरेको रकम गुम्बा निर्माणका लागि सहयोग गरेका बताए । पवित्र उद्देश्यले निर्माण भइरहेको गुम्बामा सहयोग गर्न पाउँदा उनले खुशी व्यक्त गरेका छन् । आगामी दिनमा पनि गुम्बाका लागि थप सहयोग गर्ने उनले प्रतिबद्धता जनाएका छन् । 

१ वर्षदेखि निर्माणाधिन अवस्थामा रहेको गुम्बा ३ तल्लाको बनाउने गुम्बा व्यवस्थापन समितिकी कोषाध्यक्ष ठिजुङ भोटेले जानकारी दिइन् । १ रोपनी क्षेत्रफलमा रहेको गुम्बा हाल एक तल्ला निर्माण सम्पन्न भइसकेको छ । संखुवासभाको भोटे खोलाबाट काठमाडौँ आई बसोबास गरिरहेका भोटे समुदायको सक्रियतामा गोकर्णेश्वरमा गुम्बा निर्माण भइरहेको हो । 

यसैबीच गुम्बामा नेपाल बौद्ध धर्म संरक्षण संघको नयाँ कार्यसमितिलाई समेत गुम्बाका पदाधिकारीहरुले स्वागत गरेका थिए । कार्यक्रममा संघका अध्यक्ष टासीग्याल्जेन शेर्पा (मिथुन भोटे) पूर्वअध्यक्ष युवराज ह्योल्मो, सचिव भीमबहादुर लामा, सदस्यद्व सुरज खड्का र निर्मला गुरुङ सहभागि थिए ।