जेनजी आन्दोलनमा शृंखलालाई ९० हजार घाटा !

सन् २०१८ मा मिस नेपाल वर्ल्ड चुनिएकी शृंखला खतिवडा ‘नेपो किड’को आरोपमा जेनजीको तारो बनेकी थिइन् । त्यो तारोका कारण उनको घरमा आक्रमण त भयो नै, यतिबेला उनको इन्स्टाग्राममा ‘अनफलो’ गर्नेहरूको ओइरो लागेको छ । उनलाई सामाजिक सञ्जालमा १० लाखभन्दा बढीले पछ्याइरहेका थिए ।

‘नेपोकिड’ नामक अनलाइन आन्दोलनका कारण उनले एक लाखभन्दा बढी ‘अनफलो’ अभियानमा गुमाएकी छन् । अमेरिकामा शुरु भएको ‘नेपो बेबी’कै नयाँ संस्करण हो, ‘नेपोकिड’ पनि । 

हलिउडका सेलिब्रिटीका सन्तानहरूलाई जिस्क्याउन ‘नेपोकिड’ भनी सम्बोधन गरिन्थ्यो । खासगरी बिदा मनाउन सेलिब्रिटीका सन्तानहरू स्वीट्जरल्याण्ड र अन्य भेगसम्म पुग्ने गरेको तस्वीरहरू सार्वजनिक गर्दै हाल्न थालिएको थियो ।

तिनै तस्वीरहरू सामाजिक सञ्जालमा सर्वसाधारण प्रयोगकर्ताहरूले हाल्दै ‘आवर ट्याक्सेस, देयर लक्जरी’ (हाम्रो कर, तिनको ऐश्वर्य) ह्यासट्याग प्रयोग गर्दै जिस्क्याउने गरेका थिए । र, यही अवधिमा नेपालका जेनजीले पनि शृंखला लगायतका नेताहरूका सन्तानको लक्जरी सामग्री र बिदाका भिडियोहरू समावेश गरेर जिस्क्याइएको थियो ।

यही नेपोकिड अभियान बढ्दै जाँदा जेनजीको आन्दोलनको ठीकअघि ५ सेप्टेम्बरबाट उनलाई अनफलो गर्नेहरूको संख्या बढ्न थालेको थियो । सबैभन्दा बढी चाहिँ जब जेनजी आन्दोलनमा १९ जनाको मृत्युको खबर फैलियो, उनले एकै झमटमा ९७ हजार फलोअर गुमाएकी थिइन् । 

हाल उनको इन्स्टा फलोअर ९ लाख तीन हजारमा सीमित हुन पुगेको छ । उनले २०१४ जनवरीमा इन्स्टामा खाता खोलेकी थिइन् । शृंखला एमाले नेता विरोध खतिवडा र मुनु सिग्देल खतिवडाकी छोरी हुन् ।