प्रधानन्यायाधीश शर्मा भारत भ्रमणमा, मल्ल कार्यवाहक

काठमाडौं । प्रधानन्यायाधीश डा. मनोजकुमार शर्मा भ्रमणका लागि भारत प्रस्थान गरेका छन् । भारतका प्रधान न्यायाधीश सूर्य कान्तको मैत्रीपूर्ण निमन्त्रणामा शर्मा बिहीबार भारतको राजधानी नयाँ दिल्ली प्रस्थान गरेका हुन् ।
सर्वोच्चका प्रवक्ता अर्जुनप्रसाद कोइरालाका अनुसार भ्रमणको अवधिमा शर्माले भारतको सर्वोच्च अदालतको समेत अवलोकन भ्रमण गर्ने कार्यक्रम छ । उक्त भ्रमण दलमा प्रधानन्यायाधीश शर्माकी धर्मपत्नी उमा शर्मा र सहरजिष्ट्रार अमित उप्रेती सहभागी छन् । शर्मालाई पूर्वकार्यवाहक प्रधानान्यायाधीश सपना प्रधान मल्लले विमानस्थलमा बिदाइ गरेकी छन् । प्रधानन्यायाधीशमा आफूभन्दा कनिष्ठ शर्मालाई नियुक्त गरेपछि मल्ल असन्तुष्ट थिइन् । तर, शर्मालाई बिदाइ गर्न उनी विमानस्थल पुग्नुलाई सम्बन्ध सुधार भएका रूपमा हेरिएको छ । 
शर्मा भारतमा रहँदा मल्लले कार्यवाहक प्रधानन्यायाधीशका रूपमा जिम्मेवारी सम्हाल्नेछिन् । मल्लले यसअघि पनि कार्यवाहक प्रधानन्यायाधीश बनिसकेकी छन् । साउन ११ गते शर्मा स्वदेश फर्कनेछन् ।