विपत व्यवस्थापनमा तयारी र योजना आवश्यक

काठमाडौं । सरकारले विपत्त व्यवस्थापन गर्न दूरगामी योजना र नीति ल्याउन सकेको अवस्थामा मात्र मानवीय तथा भौतिक संकटबाट बच्न सकिने तथा सबै तहका सरकारलाई संकट व्यवस्थापनमा समन्वयकारी भूमिका निर्वाह गर्न आग्रह गरेका छन् । 
समर्पण एकेडेमी क्राइस म्यानेजमेन्ट कलेजले संकट तथा विपतको व्यवस्थापनको विषयमा आयोजित कार्यक्रममा विज्ञहरुले विपत व्यवस्थापनमा सरकारको प्रभावकारी योजनामा जोड दिएका हुन् । भेनेजुएलामा गएको भूकम्प र नेपालमा गएको २०७२ को भूकम्पको अवस्थालाई दर्शाउँदै भूगर्भविद् प्रा.डा तारानिधि भट्टराईले भवन आचारसंहिताको मापदण्ड र जनस्तरमा भएको कार्यान्वयन र त्यसको प्रभावकारितामा प्रश्न गर्दै नागरिक तहमा सचेतना र कानूनी पक्षको प्रभावकारितामा जोड दिएका छन् । 
कार्यक्रममा संविधान सभाका सदस्य वरिष्ठ अधिवक्ता डा खिमलाल देवकोटाले विपत व्यवस्थापनमा तीनै तहको सरकारबीच प्रभावकारी समन्वय आवश्यक रहेको चर्चा गर्दै विपतसम्बन्धी साक्षरता आवश्यक रहेको बताए । 
त्यसैगरी क्राइस म्यानेजमेन्ट कलेजका अध्यक्ष तथा सशत्र प्रहरी बलका पूर्व आइजीपी सनतकुमार बस्नेतले संकट व्यवस्थापनमा सरकार र नागरिक समाज सबै पक्षको गम्भीरता र सर्तकता आवश्यक भएको हुँदा कलेजले संकट व्यवस्थापनमा अध्ययनरत विद्याथीहरुलाई विपत व्यवस्थापनमा अग्रसर गर्न सकिने बताए । 
कार्यक्रममा संकट व्यवस्थापनका विज्ञ डा. राजु थापाले विपतको प्रभावकारी व्यवस्थापनमा सरकार, नागरिक समाज र विज्ञ सबै पक्षको प्रभावकारी सहभागिता र समन्वय आवश्यक रहेको बताए । 
आइसिएमएसका क्याम्पस प्रमुख डा. अस्मिता खड्काले संकट व्यवस्थापन र सम्भावित विपतकोे अवस्था प्रति सबै पक्षको ध्यानाकर्षण गर्ने उद्देश्यले कार्यक्रमको आयोजना गरिएको बताउँदै सबै पक्षको सहकार्य आवश्यक रहेको बताए । कार्यक्रममा  विपतविद् रतिन्द्र क्षेत्री, पूर्व सुरक्षा अधिकारी अजय छतकुली, विभिन्न क्षेत्रका विपतविद्का साथै न्यूज२४ दैनिकका प्रधान सम्पादक नवराज चालिसेले विपत न्यूनीकरण र सचेतनाको लागि सञ्चार माध्यमले प्रभावकारी भूमिका निर्वाह गर्न सक्ने हुँदा राज्य तथा निजी क्षेत्रले मिडियाको उययोग गर्न सक्ने बताए ।