विवादास्पद यूनिफिकेशन चर्चकी प्रमुख पक्राउ

काठमाडौं (संवाददाता) - दक्षिण कोरियाको सियोलस्थित केन्द्रीय जिल्ला अदालतको आदेशमा विवादास्पद धार्मिक संस्था यूनिफिकेशन चर्चकी प्रमुख हाक जा हान मुन मंगलबार पक्राउ परेकी छन् । ८२ वर्षीया हानमाथि आफ्नो संस्थाको राजनीतिक र व्यापारिक स्वार्थ पूरा गर्न पूर्व प्रथम महिला किम कोन–हीलाई करोडौं मूल्य बराबरको घूस दिएको गम्भीर आरोप लागेको छ । यो घटनाले दक्षिण कोरियाको राजनीतिक र धार्मिक वृत्तमा ठूलो हलचल पैदा गरेको छ ।

अभियोजकहरूका अनुसार हानले पूर्व राष्ट्रपति यून सुक–योलको कार्यकालमा राजनीतिक पहुँच स्थापित गर्न र चर्चसँग सम्बन्धित व्यापारिक परियोजनाहरूमा सरकारी लाभ लिन किम कोन–हीलाई पटक–पटक महँगा उपहार दिएकी थिइन् ।

किमलाई दिइएका उपहारमा विलासी ह्यान्डब्याग, बहुमूल्य गरगहना र नगद समेत रहेको दाबी गरिएको छ । हानले चर्चका कर्मचारीमार्फत यी उपहारहरू पठाएको र यसको उद्देश्य नीतिगत निर्णयहरूलाई प्रभावित पार्नु रहेको अनुसन्धानबाट खुलेको अन्तर्राष्ट्रिय सञ्चारमाध्यमहरूले जनाएका छन् ।

अदालतले हानलाई पक्राउ गर्न अनुमति दिदै उनले प्रमाण नष्ट गर्न सक्ने वा फरार हुन सक्ने जोखिम रहेको औंल्याएको छ । यद्यपि हानले आफूमाथि लगाइएका सबै आरोपहरू अस्वीकार गरेकी छन् । उनले एक विज्ञप्ति जारी गर्दै चर्चका एक अधिकारीले आफ्नो अधिकारको दुरुपयोग गरी आफूलाई फसाएको र पूर्व प्रथम महिलासँग आफ्नो कुनै अनुचित सम्बन्ध नरहेको दाबी गरेकी छन् । 

‘द फ्यामिली फेडरेशन फर वर्ल्ड पिस एन्ड यूनिफिकेशन’ नामक यो संस्था विश्वभरि नै आफ्नो अपारदर्शी आर्थिक गतिविधि र अनुयायीहरूमाथिको नियन्त्रणका कारण आलोचित रहँदै आएको छ ।

जापानका पूर्व प्रधानमन्त्री शिन्जो आबेका हत्याराले आफ्नी आमाले चर्चलाई ठूलो रकम दान दिएर परिवार टाट पल्टाएको र त्यसको बदलामा आबेको हत्या गरेको बयान दिएपछि यो चर्च अन्तर्राष्ट्रिय रूपमा थप विवादमा तानिएको थियो । यस चर्चको शाखा नेपालमा पनि ‘यूनिभर्सल पिस फेडेरेसन’को नाममा लामो समयदेखि सक्रिय छ ।

नेपालमा विभिन्न समयमा ‘एसिया प्यासिफिक समिट’ जस्ता भव्य कार्यक्रम आयोजना गरी राज्यको समेत सहभागिता गराएको यो संस्था ‘होली वाइन’ जस्ता विवादास्पद गतिविधि र उच्च पदस्थ राजनीतिज्ञहरूसँगको सम्बन्धका कारण पटक–पटक चर्चामा आउने गरेको छ । हानको पक्राउले चर्चको विश्वव्यापी सञ्जाल र अपारदर्शी आर्थिक कारोबारमाथि थप अनुसन्धानको ढोका खोलेको छ ।