काठमाडौँमा १२ हाई मास्ट लाइट जडान, ६२ वटा लाइट दशैंअघि सञ्चालनमा ल्याउने

काठमाडौँ, ८ असोज – काठमाडौँ महानगरपालिकाले दीर्घकालीन प्राथमिकतामा राखिएको ‘उज्यालो महानगर योजना’अन्तर्गत हालसम्म १२ वटा ‘हाई मास्ट लाइट’ जडान गरिसकेको छ । करिब १० करोड रुपैयाँ लागतमा ६२ वटा लाइट जडान गर्ने योजना अघि बढाइएको छ, जसअन्तर्गत बाँकी सबै लाइटलाई दशैंअघि सञ्चालनमा ल्याउने तयारी भइरहेको महानगरले जनाएको छ ।

महानगर प्रमुख बालेन्द्र शाहका अनुसार, अघिल्लो कार्यकालमा जडान गरिएका तर नबलेका २ हजारभन्दा बढी सोलार स्ट्रिट लाइटलाई इलेक्ट्रिकलमा रूपान्तरण गरिएको छ, जसले हाल शहरका मुख्य सडकहरू उज्यालो बनाएका छन् । यससँगै करिब ८५ करोड रुपैयाँको स्ट्रीट लाइट खरिद तथा जडान कार्य अन्तिम चरणमा पुगेको छ ।

यस परियोजना सम्पन्न भएसँगै राजधानी काठमाडौँलाई पूर्ण रूपमा ‘उज्यालो महानगर’को रुपमा रुपान्तरण गर्ने अपेक्षा गरिएको छ । नयाँ बसपार्कमा दुईवटा ‘हाई मास्ट लाइट’ जडान भइसकेका छन् भने थप जडान कार्य तीव्र गतिमा अघि बढाइएको छ ।