नेप्सेमा पुनः गिरावट, कारोबार रकम नौ दिनयताकै न्यून

काठमाडौं । पछिल्ला केही कारोबार दिनमा सामान्य सुधार देखिएको सेयर बजारमा साताको अन्तिम कारोबार दिन बिहीबार पुनः गिरावट आएको छ  । बजार परिसूचक नेपाल स्टक एक्सचेन्ज (नेप्से) १२ . ९५ अंकले घटेर २ हजार ६५२ . ५८ विन्दुमा झरेको छ  । अघिल्लो दिनको तुलनामा नेप्से ० . ४८ प्रतिशतले घटेको हो  ।
बिहीबार बजार खुलेको सुरुवाती दुई मिनेटसम्म परिसूचक बढ्ने संकेत देखिए पनि त्यसपछि बिक्री चाप बढ्दा बजार दिनभरजसो ओरालो लागेको थियो  । 
बुधबार ७ अर्ब ४३ करोड रुपैयाँभन्दा बढीको सेयर कारोबार भएकोमा बिहीबार घटेर ४ अर्ब ७२ करोड २२ लाख रुपैयाँमा सीमित भएको छ  । यो पछिल्लो नौ कारोबार दिनयताकै न्यून कारोबार रकम हो  । बिहीबार कुल १ करोड २३ लाख ७३ हजार ८४१ कित्ता सेयर किनबेच भएका छन्  ।
बजारमा कारोबार भएका कम्पनीको मूल्यमा आएको गिरावटले पनि बिक्री चाप बढी रहेको देखाउँछ  । बिहीबार कुल ३४९ कम्पनीका धितोपत्र कारोबार भएकामा २११ कम्पनीको सेयर मूल्य घटेको छ  । ५६ कम्पनीको मूल्य बढ्दा १२ कम्पनीको मूल्य भने स्थिर रहेको छ  ।
विहिवार सेन्सेटिभ इन्डेक्स १ . ५७ अंकले घटेर ४५७ . ०६ विन्दुमा पुगेको छ  । त्यस्तै, फ्लोट इन्डेक्स ०.९६ अंक र सेन्सेटिभ फ्लोट इन्डेक्स ०.६८ अंकले घटेका छन्  । ठूला तथा कारोबारयोग्य कम्पनीको सेयर मूल्यमा समेत दबाब देखिँदा समग्र बजारमा गिरावट आएको हो  ।
लघुवित्तबाहेक सबै समूह घटे
समूहगत परिसूचकतर्फ १३ उपसमूहमध्ये लघुवित्त समूहबाहेक सबै समूहको सूचक घटेको छ  । लघुवित्त समूहको परिसूचक ०.०९ प्रतिशतले बढेको छ । बाँकी १२ समूहमा भने बिक्री चाप देखिएको छ ।

बिहीबार सबैभन्दा धेरै विकास बैंक समूहको परिसूचक ०.७० प्रतिशतले घटेको छ । त्यस्तै, जलविद्युत् समूह ०.६७ प्रतिशत, उत्पादन तथा प्रशोधन समूह ०.६२ प्रतिशत, बैंकिङ समूह ० . ५७ प्रतिशत र वित्त समूह ०.५० प्रतिशतले घटेका छन् ।
जीवन बीमा समूहको परिसूचक ०.४६ प्रतिशतले घट्दा अन्य समूहमा पनि सामान्य गिरावट आएको छ । 
केही कम्पनीको मूल्यमा भने वृद्धि
समग्र बजार घटे पनि केही कम्पनीको सेयर मूल्यमा उल्लेख्य सुधार देखिएको छ  । बिहीबार कारोबार भएका कम्पनीमध्ये केएसवाईको सेयर मूल्य सर्वाधिक २.९६ प्रतिशतले बढेको छ । त्यस्तै, स्नोर्लको २.८६ प्रतिशत, एएचएलको २.७० प्रतिशत, सीबीडीएलको २.६९ प्रतिशत र केईएफको सेयर मूल्य २.६२ प्रतिशतले बढेको छ  ।
यद्यपि, बजारमा धेरै कम्पनीको मूल्य घटेकाले यी कम्पनीको सकारात्मक प्रदर्शनले समग्र परिसूचकलाई उकास्न सकेन  । ऋणपत्रतर्फ १०.२५ प्रतिशत केबीएल डिबेञ्चर २०८६ को मूल्य सर्वाधिक ५.०९ प्रतिशतले घटेको छ  ।
कारोबारमा आँखुखोला जलविद्युत् अगाडि
कारोबार रकमका आधारमा बिहीबार आँखुखोला जलविद्युत् कम्पनी शीर्ष स्थानमा रहेको छ  । उक्त कम्पनीको १८ करोड १९ लाख रुपैयाँभन्दा बढीको सेयर कारोबार भएको छ  ।

दोस्रो स्थानमा रहेको नेपाल पुनर्बीमा कम्पनीको १४ करोड ७५ लाख रुपैयाँ बराबरको सेयर किनबेच भएको छ । त्यस्तै, घलेम्दी हाइड्रोपावरको १४ करोड ३३ लाख रुपैयाँ, अपि पावर कम्पनीको १३ करोड ९९ लाख रुपैयाँ र एनआईसी एसिया बैंकको १२ करोड ९९ लाख रुपैयाँ बराबरको सेयर कारोबार भएको छ ।
बिहीबार कुल ४४ हजार ४१२ वटा कारोबारमार्फत कम्पनीका धितोपत्र किनबेच भएका छन्  । यस दिन बजारको कुल बजार पुँजीकरण ४५ खर्ब ६६ अर्ब रुपैयाँभन्दा बढी रहेको छ । त्यस्तै, फ्लोट बजार पुँजीकरण १५ खर्ब ५२ अर्ब रुपैयाँभन्दा बढी पुगेको छ ।