प्रा.डा. त्रिपाठी र अर्याललाई सम्मान गरिने

राजधानीको गोकर्णेश्वर—५ स्थित नयाँ बस्ती युवा क्लबले १ सय १८ औं देवकोटा जयन्ती एवं क्लबको ४० औं वार्षिकोत्सवको अवसरमा विगतमा झँै यस वर्ष पनि स्रष्टा सम्मान कार्यक्रम गर्ने भएको छ । 
लक्ष्मी पूजाको अवसर पारी प्राध्यापक डाक्टर वासुदेव त्रिपाठी र समाजसेवी निर्मल अर्याललाई सम्मान गर्न लागिएको क्लबका अध्यक्ष चन्द्रमणि गौतमले जानकारी दिए । 
प्रज्ञा प्रतिष्ठानका पूर्व उपकुलपति एवं नेपाली समालोचना क्षेत्रका शिखर व्यक्तित्व प्राध्यापक डाक्टर त्रिपाठीलाई रु. ५१ हजार राशी सहितको सम्मान अर्पण गरिने क्लबका सचिव रामचन्द्र दंगालले बताए  । यस्तै समाजसेवी एवं युवा सर्जक निर्मल अर्याललाई २५ हजार रुपैयाँसहित सम्मान गर्न लागिएको हो । 
मुलुककै एक क्रियाशील क्लबको रुपमा पहिचान बनाएको नयाँ बस्ती युवा क्लबले समाजसेवा, साहित्य, खेलकुद, स्वास्थ्य लगायतका विधामा लामो समयअघि देखि विविध रचनात्मक कार्यक्रम सञ्चालन गर्दै आएको छ ।