एनपीएलः टुंगियो जनकपुर बोल्ट्सको यात्रा

नेपाल प्रिमियर लिग (एनपीएल) को शुक्रबारको दुवै खेल रोमाञ्चक र कम स्कोरको रह्यो । दिउँसोको २४औं खेलमा सुदूरपश्चिम रोयल्सले काठमाडौं गोर्खाजलाई ७ रनले हरायो । साँझको २५औं खेलमा चितवन राइनोजले जनकपुर बोल्ट्सलाई ४ विकेटले पराजित ग¥यो । दुवै खेल त्रिभुवन विश्वविद्यालय अन्तर्राष्ट्रिय क्रिकेट मैदान, कीर्तिपुरमा भएका हुन् ।
पहिलो ब्याटिङ गरेको सुदूरपश्चिम रोयल्सले २० ओभरमा ६ विकेट गुमाएर १२५ रन बनायो । विजयका लागि १२६ रनको लक्ष्य पाएको काठमाडौं गोर्खाज २० ओभरमा ७ विकेटमा ११८ रनमै रोकियो ।
रोयल्सका दिपेन्द्रसिंह ऐरीले ५५ बलमा ६० रन बनाए । उनको यही इनिङ निर्णायक सिद्ध भयो र उनी खेलका उत्कृष्ट खेलाडी (प्लेयर अफ द म्याच) घोषित भए । रोयल्स तालिकामा पहिलो स्थानमा छ । गोर्खाज तेस्रो स्थानमा छ ।
लक्ष्यको पछ्याइमा गोर्खाजको सुरुवात निकै खराब रह्यो । स्कट कुगेलेइनको पहिलो ओभरमै भीम शार्कीले खाता खोल्न नपाई आरिफ शेखलाई क्याच दिएर फर्किए । दोस्रो ओभरमा हेमन्त धामीको बलमा स्याम हेजलेट रन आउट भए । उनले ७ बलमा एक छक्का र एक चौकासहित ११ रन बनाएका थिए । त्यो ओभरमा १३ रन गए पनि, पाँच वाइडसहित, गोर्खाजले दुई विकेट गुमाइसकेको थियो ।
मध्यक्रममा पनि गोर्खाज सम्हालिन सकेन । सन्तोष यादवले १९ बलमा १० रन बनाएर अनिल खरेलको बलमा कुगेलेइनलाई क्याच दिए । त्यसको केही बलपछि सहान अरच्चिगे खाता नखोली खरेलकै बलमा विकेटकिपर भण्डारीलाई क्याच दिएर फर्किए । मोहम्मद आदिल आलमले २४ बल खेले पनि ८ रन मात्र बनाउन सके । उनी फेबियन एलनको बलमा खरेलद्वारा क्याच आउट भए । यसपछि गोर्खाजको स्कोर ५ विकेटमा ५२ रन थियो ।
राशिद खानको एक्लो संघर्ष
विकेट झरिरहँदा राशिद खानले एकल प्रयास गरे । उनले ३१ बलमा ५ चौकासहित नाबाद ३५ रन बनाए, तर अर्को छेउमा साझेदारी जम्न सकेन । दुसान हेमन्थाले १८ बलमा एक चौका र एक छक्काका साथ २१ रन जोडे । उनले १४औं ओभरमा एलनलाई एक छक्का र एक चौका हाने । त्यो ओभरमा १५ रन आयो । तर १४.२ मा हेमन्था रन आउट भए । त्यसपछि गोर्खाजको आशा धमिलियो ।
अन्तिम पाँच ओभरमा गोर्खाजलाई धेरै रन चाहिएको थियो । १८औं ओभरमा करण केसी धामीको बलमा आरिफ शेखलाई क्याच दिएर फर्किए । १९औं ओभर सुरु हुँदा आवश्यक रन दर १६ पुगिसकेको थियो । कुगेलेइनको त्यो ओभरमा ६ रन मात्र आयो । अन्तिम ओभरमा धामीले ८ रन दिए, जसमा एक वाइड र एक नो बल पनि थियो । गोर्खाजले लक्ष्यभन्दा ७ रन पछाडि रहेर इनिङ टुंग्यायो ।
रोयल्सका बलरहरूले कसिलो बलिङ गरे । अनिल खरेलले ४ ओभरमा १८ रन दिएर २ विकेट लिए । कुगेलेइनले ४ ओभरमा १५ रन दिएर १ विकेट लिए । धामीले ४ ओभरमा २५ रन दिएर १ विकेट लिए । एलनले ४ ओभरमा ३२ रन खर्चेर १ विकेट लिए । तरिन्दु रत्नायकेले ४ ओभरमा २० रन दिए, तर विकेट पाएनन् । फिल्डिङमा पनि रोयल्स चुस्त देखियो । दुई खेलाडी रन आउट भए भने आरिफ शेखले दुई क्याच लिए ।
चितवनको कठिन जित
साँझको खेलमा जनकपुर बोल्ट्स ९ विकेट गुमाएर ८८ रनमा सीमित भयो । चितवन राइनोजले ८९ रनको लक्ष्य १७.२ ओभरमा ६ विकेट गुमाएर हासिल ग¥यो । उसले १६ बल बाँकी छँदै ४ विकेटले जित निकाल्यो । तालिकामा चितवन चौथो र जनकपुर छैटौं स्थानमा छ ।
सानो लक्ष्य भए पनि चितवनको पछ्याइ सहज रहेन । जनकपुरका बलरहरूले सुरुमै दबाब सिर्जना गरे । पहिलो ओभरको दोस्रो बलमै ललित राजवंशीले अर्जुन साउदलाई खाता खोल्न नदिई बोल्ड गरे । त्यसपछि कामिल मिसाराले आक्रामक सुरुवात गरे । उनले ६ बलमा एक चौका र एक छक्कासहित १२ रन बनाए । तर तेस्रो ओभरमै राहुल यादवले उनलाई राजवंशीको हातमा क्याच गराए । त्यही ओभरमा यादवले रवि बोपारालाई पनि बोल्ड गरे । बोपाराले १६ बलमा ३ चौकासहित १३ रन बनाएका थिए ।
चौथो ओभरमा राजवंशीले सिकन्दर रजालाई एलबीडब्ल्यू गरे । रजाले दुई बल खेले पनि खाता खोल्न सकेनन् । बिबेक यादवले एक छक्कासहित केही आक्रामक खेल देखाए । पाँचौं ओभरमा राहुल यादवको बलमा उनी ७ रन बनाएर विकेटकिपर कार्कीलाई क्याच दिए । छ ओभर सकिँदा चितवन ५ विकेटमा ३९ रन थियो । जनकपुरले खेलमा पुनरागमन गर्न सक्ने सम्भावना त्यहीँबाट देखिएको थियो ।
यादवले तीन ओभरमा १९ रन दिएर ३ विकेट लिए, जुन जनकपुरका बलरमध्ये उत्कृष्ट थियो । राजवंशीले २ विकेट लिए । बिशाल श्रेष्ठले १३औं ओभरमा कुशल मल्लको विकेट लिए । कुशलले २५ बलमा १५ रन बनाएका थिए ।
तर डेभिड मलानले धैर्यपूर्वक खेल्दै चितवनलाई जित दिलाए । उनले सुरुमा संयमित खेल देखाए । कामल ऐरीसँग निर्णायक साझेदारी बनाए र अन्तमा १७.२ ओभरमा राजवंशीको बलमा छक्का हानेर खेल सकाए । मलानले करिब ३९ बलमा ३५ रन बनाए । कामल ऐरीले नाबाद ७ रन जोडे । जनकपुरका हरमित सिंह र राइन बर्लले मध्य ओभरमा रन रोके पनि थप विकेट लिन सकेनन् ।
दिनको दुई नतिजापछि सुदूरपश्चिम रोयल्सले शीर्ष स्थान सुरक्षित राखेको छ । काठमाडौं गोर्खाजले अंकतालिकामा तेस्रो स्थान कायम राखे पनि यो पराजयले उसको अभियानमा असर पर्न सक्छ । चितवनले महŒवपूर्ण दुई अंक जोड्दै चौथो स्थानमा आफ्नो उपस्थिति बलियो बनाएको छ । जनकपुरका लागि भने यो हार निराशाजनक रह्यो ।