नेपाल लाइफ इन्स्योरेन्सलाई इक्रा नेपालबाट ‘डबल ए माइनस’ रेटिङ, जीवन बीमा क्षेत्रमै पहिलो कम्पनी

नेपालको सर्वाधिक विश्वासिलो जीवन बीमा कम्पनी नेपाल लाइफ इन्स्योरेन्स कम्पनी लिमिटेडले इक्रा नेपालबाट ‘डबल ए माइनस रेटिङ प्राप्त गरेको छ । यो श्रेणीमा पर्ने संस्थाहरूलाई अत्यन्त उच्च स्तरको सुरक्षित र वित्तीय दायित्व समयमै पूरा गर्ने क्षमतायुक्त मानिन्छ । यससँगै नेपाल लाइफ जीवन बीमा क्षेत्रमै यो रेटिङ प्राप्त गर्ने पहिलो जीवन बीमा कम्पनी बनेको छ ।

कम्पनीले आफ्नो वित्तीय स्थायित्व, बलियो बजार स्थिति र समयमै दायित्व पूरा गर्ने क्षमताका आधारमा उक्त रेटिङ पाएको हो । सन् २००१ मा स्थापना भएको नेपाल लाइफले हाल देशभर १९० भन्दा बढी शाखा सञ्चालन गर्दै आ.व. २०८१÷८२ को असार मसान्तसम्म २७% भन्दा बढी बजार हिस्सा कायम राख्न सफल भएको छ । कम्पनीको सोल्भेन्सी अनुपात १५०.४०% रहेको छ, जुन बीमा प्राधिकरणले तोकेको न्यूनतम स्तरभन्दा बढी हो ।

लगानीको दृष्टिले कम्पनीले ९४% रकम स्थिर ब्याज दिने उपकरणहरूमा लगानी गरेको छ भने यसबाट असार मसान्तसम्म औसत १०.०२% प्रतिफल प्राप्त भएको छ । आ.व. २०८०÷८१ मा कम्पनीले रू. २.१२ अर्ब खुद नाफा आर्जन गरेको र शेयरधनी कोषमा १८% प्रतिफल कायम गरेको छ । कम्पनीले आफ्नो जोखिम सन्तुलनका लागि ८८ नेपाल पुनर्बीमा कम्पनी, हिमालयन पुनर्बीमा लिमिटेड र ह्यानोभर रि(जर्मनी)सँग पुनर्बीमा सम्झौता गरेको छ ।

नेपाल लाइफको करिब ९८.८०% व्यवसाय सावधिक जीवन बीमामा आधारित छ । कम्पनीले हालसम्म १ अर्ब ३२ करोड रुपैयाँ बराबरको विपद् कोष, २३३ अर्बभन्दा बढी जीवन बीमा कोष, २४० अर्बभन्दा बढी लगानी र ६७ अर्बभन्दा माथिको दाबी भुक्तानी गरेको छ ।

कम्पनीका प्रमुख कार्यकारी अधिकृत प्रवीण रमण पराजुलीले नेपाल लाइफले उच्च रेटिङ पाएकोमा सबै सरोकारवालाप्रति आभार व्यक्त गर्दै कम्पनीले जोखिम न्यूनीकरणका उपाय र लगानी विविधिकरणलाई प्राथमिकता दिने प्रतिबद्धता जनाएका छन् । सञ्चालक समिति, अभिकर्ता, कर्मचारी, शेयरधनी, बीमित तथा नियामक निकायहरूप्रति विशेष धन्यवाद व्यक्त गर्दै कम्पनीको विश्वसनीयता, पारदर्शिता र दीर्घकालीन स्थायित्व कायम राख्ने संकल्प पराजुलीले दोहोर्याएका छन् ।