पूर्वसचिव मिश्रासँग धरौटी माग

काठमाडौं । भ्रष्टाचार मुद्दामा स्वास्थ्य तथा जनसंख्या मन्त्रालयकी पूर्व अतिरिक्त सचिव डा. संगीता मिश्रासँग विशेष अदालतले पाँच लाख रुपैयाँ धरौटी माग गरेको छ ।

न्यायाधीश नारायणप्रसाद पौडेल, डिल्लीरत्न श्रेष्ठ र विदुर कोइरालाको इजलासले बुधबार धरौटी माग गरेको हो । अदालतका सूचना अधिकारी यज्ञराज रेग्मीका अनुसार थुकछेक बहसमा उनीसँग पाँच लाख धरौटी मागको आदेश भएको हो ।

म्यामोग्राफी मेसिन खरिदमा भ्रष्टाचार गरेको ठहर गर्दै अख्तियार दुरूपयोग अनुसन्धान आयोगले स्वास्थ्य सेवा विभागका तत्कालीन महानिर्देशक डा. मिश्रासहित १४ जनाविरूद्ध गत कात्तिक २ मा विशेष अदालतमा मुद्दा दायर गरेको थियो । मिश्रासहित विभाग व्यवस्थापन महाशाखाका तत्कालीन निर्देशक डा. श्रवणकुमार थापा, वरिष्ठ स्वास्थ्य प्रशासक डा. सुरेन्द्रप्रसाद चौरसिया, निर्देशक डा. विवेकुमार लाल, प्रमुख लेखा नियन्त्रक भुवनप्रसाद काफ्ले, कानुन अधिकृत सीता घिमिरे, जनस्वास्थ्य अधिकृत दीपक अधिकारी लगायतविरूद्ध मुद्दा दर्ता भएको थियो ।

प्रतिवादीहरूले झुट्टा बिल, गलत प्रतिवेदन र मिलेमतोका आधारमा राज्यलाई करिब १४ करोड ६ लाख ८५ हजार रूपैयाँभन्दा बढी हानी पुर्‍याएको मागदाबी अख्तियारले लिएको छ । 

उक्त रकम बराबरको जरिवाना र कैद सजायको माग दायर आरोपपत्रमा छ । वर्तमान सरकारमा मन्त्री बनाउने अन्तिम तयारी भइरहेका बेला मिश्राको नाम फिर्ता भएको थियो । उनीविरुद्ध भ्रष्टाचार मुद्दामा अख्तियारले अनुसन्धान गरिरहेको खुलेपछि सपथ ग्रहणको केहीअघि मिश्रा मन्त्री बन्नबाट छुटाइएकी थिइन ।