वातावरण निरीक्षकको विवरण माग

काठमाडौं । देशभर रहेका वातावरण निरीक्षकको विवरण उपलब्ध गराइदिन संघीय मामिला तथा सामान्य प्रशासन मन्त्रालयले सबै गाउँपालिका र नगरपालिकाहरूलाई पत्राचार गरेको छ ।                

वन तथा वातावरण मन्त्रालयको आग्रहबमोजिम संघीय मामिला तथा सामान्य प्रशासन मन्त्रालयले सबै स्थानीय तहलाई वातावरण निरीक्षकको जानकारी उपलब्ध गराइदिन पत्राचार गरेको हो । मुलुकमा हाल संघ, प्रदेश र स्थानीय तहमा के–कति संख्यामा वातावरण निरीक्षक छन् ? मुलुकका लागि आवश्यक वातावरण निरीक्षकको संख्या के कति हो ? भन्ने जानकारी मन्त्रालयले खोजेको हो । उपलब्ध जनशक्तिले मुलुकको वातावरणसम्बन्धी विषयलाई सम्बोधन गर्न सकिने अवस्था छ कि छैन भन्ने विषयमा प्रदेश तथा स्थानीय तहबाट तोकिएको ढाँचामा विवरण उपलब्ध गराइदिन मन्त्रालयले अनुरोध गरेको छ । वातावरणसँग सम्बन्धित विषयका जानकारी लिन, नियमन तथा वातावरण संरक्षणका कामका लागि वातावरण निरीक्षकको व्यवस्था गरिएको छ । उपलब्ध जनशक्तिले तोकिएको काम पूरा गर्न सम्भव छ कि छैन, आवश्यक पदपूर्ति गर्नुपर्ने संख्या के–कति हो भन्ने विवरण उपलब्ध गराइदिन संघीय मामिला मन्त्रालयले पत्राचार गरेको हो ।