‘म्यान अफ द गोरखा’ दौडको उपाधि रोकायलाई

गोरखा । गोरखामा आयोजित ‘म्यान अफ द गोरखा’ दौड प्रतियोगिताको उपाधि नेपाली सेनाका राजन रोकायले जितेका छन्। गोरखा उद्योग वाणिज्य संघ गोरखाले १२ औं गोरखा महोत्सवको अवसरमा सोमबार आयोजना गरेको प्रतियोगितामा कुल ८ किलोमिटर दूरी त्रिभुवन आर्मी क्लबका धावक रोकायले २९ मिनेट ३८ सेकेण्डमा पूरा गरेर उपाधि हात पारेका छन् । गोरखा नगरपालिका–५, स्थित ऐतिहासिक पस्लाङ चौताराबाट सुरु भएको दौड हनुमान भञ्ज्याङ हुँदै गोरखा दरबार परिसरमा समापन भएको थियो । प्रतियोगितामा नेपाली सेनाकै गणेश रावलले ३० मिनेट १८ सेकेण्डमा दौड पूरा गर्दै दोस्रो भएको संघका अध्यक्ष भगवान् बाबु मास्केले जानकारी दिए ।

त्यस्तै त्रिभुवन आर्मी क्लबका अर्का धावक टंकबहादुर कार्कीले निर्धारित दूरी ३० मिनेट ५९ सेकेण्डमा पूरा गरेर प्रतियोगितामा तेस्रो भए । प्रतियोगितामा नेपाल प्रहरीका सन्तोषनाथ योगीले सान्त्वना स्थान प्राप्त गरे । उनले निर्धारित दूरी ३१ मिनेट २५ सेकेण्डमा पूरा गरेका थिए । त्यस्तै सशस्त्र प्रहरी वलकी धाविका आष्मा विकले निर्धारित दूरी ४२ मिनेट १० सेकेन्डमा पूरा गरेर सान्त्वना स्थान हासिल गरेकी छन् । प्रतियोगितामा प्रथम हुनेलाई नगद रु. ३० हजार, द्वितीयलाई रु. २० हजार र तृतीयलाई रु. १० हजार र सान्त्वनालाई रु. ५ हजार नगदसहित प्रमाणपत्र प्रदान गरिएको छ ।