काठमाडौँमा इजरायली नाटक 'विथआउट एन एभिल आई' मञ्चन

काठमाडौँ । नेपालस्थित इजरायली दूतावासको संयोजनमा इजरायलको चर्चित 'नेफेश थिएटर' द्वारा तयार पारिएको एकल नाटक 'विथआउट एन एभिल आई' काठमाडौँमा सफलतापूर्वक मञ्चन गरिएको छ ।

बुधबार र बिहीबार (नोभेम्बर ४ र ५) दुई दिन मञ्चन गरिएको एक घण्टा लामो उक्त नाटकमा नाट्य शैली र 'स्ट्यान्ड-अप कमेडी' को रोचक समीश्रण प्रस्तुत गरिएको थियो । नाटकले इजरायली अभिनेता तथा लेखक असाफ बेन शिमोनको वास्तविक जीवनको कथालाई समेटेको छ, जसले आफ्नो आँखाको ज्योति बिस्तारै गुम्दै जाँदा पनि हरेस नखाई जीवनप्रति कसरी नयाँ र सकारात्मक दृष्टिकोण फेला पारे भन्ने प्रेरणादायी यात्रालाई देखाउँछ ।

ललितकला क्षेत्रमा क्रियाशील संस्था 'लालाबला' सँगको सहकार्यमा इम्पेरियल वर्ल्ड स्कूलद्वारा आयोजित 'थिएटर फेस्टिभल २०२६ - सिजन ६' अन्तर्गत नोभेम्बर ४ मा पहिलो प्रदर्शनी गरिएको थियो भने नोभेम्बर ५ मा प्रज्ञा कुञ्जका विद्यार्थीहरू तथा अन्य आमन्त्रित अतिथिहरूको विशेष उपस्थितिमा नाटकको दोस्रो मञ्चन गरिएको हो ।

यो नाटकलाई नेपाल ल्याउन नेफेश थिएटरका तीन जना प्रमुख विशेषज्ञहरू खटिएका छन् । जसमा अंग्रेजी, हिब्रू र यिडिस भाषामा १०० भन्दा बढी नाटक निर्देशन गरिसकेका कलात्मक निर्देशक हावर्ड रिप (निर्माता तथा अनुवादक), स्वयं लेखक तथा अभिनेता असाफ बेन शिमोन र प्राविधिक निर्देशक नोआम टोप्लियन रहेका छन् ।

नेपालका लागि इजरायली राजदूत श्मुलिक अरी बासले नाटकको स्वागत गर्दै रङ्गमञ्चले सिमानाहरू भन्दा माथि उठेर कथा वाचनको माध्यमबाट मानिसहरूलाई एकजुट बनाउने बताए । उनले भने, "मानवीय दृढता र मानिसलाई प्रेरित तथा जोड्न सक्ने कलाको विश्वव्यापी शक्तिलाई उत्सवका रूपमा मनाउने यो प्रेरणादायी इजरायली प्रस्तुति नेपाली दर्शकसँग साझा गर्न पाउँदा दूतावास निकै खुसी छ ।"

यस किसिमको प्रस्तुतिले कलात्मक र सांस्कृतिक आदानप्रदानको माध्यमबाट इजरायल र नेपालबीचको वर्षौँ पुरानो सांस्कृतिक सम्बन्धलाई थप सुदृढ बनाउन र द्विपक्षीय सहयोगलाई प्रवर्द्धन गर्न महत्त्वपूर्ण भूमिका खेल्ने विश्वास दूतावासले लिएको छ ।