मधेशमा नेकपाका ४ मन्त्रीले दिए राजीनामा

काठमाडौं । मधेश प्रदेशमा नेकपाका ४ जना मन्त्रीले सामूहिक राजीनामा दिएका छन् । आर्थिक मामिला मन्त्री युवराज भट्टराई, उद्योग तथा पर्यटन मन्त्री कनिष पटेल, ऊर्जा सिँचाइ तथा खानेपानी मन्त्री जवाहरलाल कुशवाहा र गृह, सञ्चार तथा कानुनमन्त्री फकिरा महतोले राजीनामा बुझाएका हुन् ।
‘राजनीतिक निकासको लागि हामी नेपाली कम्युनिस्ट पार्टीमा तपसिलका मन्त्रीहरूको सामूहिक राजीनामा पेस गर्दछौं,’ राजीनामा पत्रमा उल्लेख छ, छ, ‘यहाँले गर्नुभएको सहयोगका लागि हार्दिक धन्यवाद व्यक्त गर्दछौं ।’ नेकपाले सरकारलाई दिएको समर्थनसमेत फिर्ता लिएको छ । प्रदेश प्रमुखलाई समर्थन फिर्ता लिएको पत्र बुझाएका छन् । राजनीतिक निकासको लागि राजीनामा बुझाएको मन्त्रीहरूले पत्रमा उल्लेख गरेका छन् ।
यसअघि गत असोज ३० गते एमालेले सरकारलाई दिएको समर्थन फिर्ता लिँदै आफ्ना चार मन्त्रीलाई फिर्ता बोलाएपछि मुख्यमन्त्री कृष्णप्रसाद यादव नेतृत्वको सरकार अल्पमतमा परेको थियो । नेकपाले भने सरकारलाई दिएको समर्थन कायमै राखेको थियो । नेकपाले पनि समर्थन फिर्ता लिएपछि मुख्यमन्त्री यादव नेतृत्वको सरकार थप राजनीतिक संकटमा परेको छ । मधेस प्रदेशमा कांग्रेस नेतृत्वको सरकार छ । मधेसको सरकार जोगाउन भन्दै कांग्रेस सभापति गगन थापाले नेकपा अध्यक्ष पुष्पकमल दाहाल प्रचण्ड र एमाले अध्यक्ष केपी ओलीसँग भेटवार्ता गरेका थिए । मुख्यमन्त्री यादवले कात्तिक २८ गतेभित्र विश्वासको मत लिनुपर्ने हुन्छ ।