आयात परिमाण बढाइएको छ, अब ग्यास अभाव हुँदैन : संघ

काठमाडौं (संवाददाता) । नेपाल एलपी ग्यास उद्योग संघले आयात परिमाण बढाइएकाले बजारमा खाना पकाउने एलपी ग्यासको अभाव नहुने स्पष्ट पारेको छ । संघले विज्ञप्ति जारी गरी नेपाल आयल निगमले नियमित रूपमा परिमाण बढाएर ग्यास आयात गरिरहेकाले बजारमा अभाव नहुने जनाएको हो ।

संघले ग्यास आयात पर्याप्त मात्रामा भइरहेकाले अनावश्यक रूपमा सिलिन्डर भण्डारण गरी घरमा नराख्न उपभोक्तालाई आग्रह पनि गरेको छ । करिब डेढ सातादेखि काठमाडौँ उपत्यकासहितका क्षेत्रमा  एलपी ग्यासको अभाव हुन लागेको भन्ने खबर सार्वजनिक भएपछि उपभोक्ताले सबै सिलिन्डर भण्डारण गरेर राख्दा धेरै उपभोक्ताले ग्यास पाउन सकेका थिएनन् ।

‘ग्यास अभाव नभए पनि सञ्चार माध्यम र सामाजिक सञ्जालमा आएका प्रचारले धेरै उपभोक्ताले आवश्यकताभन्दा बढी सिलिन्डर भण्डारण गरेर राख्ने क्रम बढ्यो । ग्यास आइरहेको छ । भण्डारण गरेर नराख्नु होला,’ संघको विज्ञप्तिमा भनिएको छ ।

भारतका विभिन्न रिफाइनरीहरूमा भएको मर्मतसम्भारको कार्य तथा ढुवानीका क्रममा देखिएका केही प्राविधिक समस्याका कारण विगत केही दिनदेखि बजारमा आपूर्तिमा सामान्य असन्तुलन देखिएको भने संघले स्वीकार गरेको छ ।

अहिले ती सबै समस्याहरू समाधान भइसकेको र आपूर्ति व्यवस्था पूर्णरूपमा सुरु भइसकेको संघका अध्यक्ष दिवानबहादुर चन्दले बताए । उनले अहिले प्रत्येक ग्यास उद्योगहरूले आफूले आयात गर्नुपर्ने तोकिएको परिमाणमा ग्यास आयात गरी बजारमा निरन्तर बिक्री वितरण गरिरहेको बताए । 

बजारमा माग बढ्न सक्ने अवस्थालाई मध्यनजर गर्दै निगमले समेत उद्योगहरूलाई थप ग्यास आयात गर्न अनुमति दिइसकेको संघको विज्ञप्तिमा उल्लेख छ । ‘निगमले बढी आयात गर्न अनुमति दिइसकेको र उद्योगहरूले पनि तीव्र गतिमा आपूर्ति गरिरहेकाले अब बजारमा ग्यासको अभाव हुँदैन, त्यसकारण पनि आम उपभोक्तालाई ग्यास नपाइने डरले अनावश्यक रूपमा सिलिन्डर सञ्चित नगर्न हार्दिक अनुरोध गर्दछौँ,’ विज्ञप्तिमा भनिएको छ ।

बजारमा ग्यासको आपूर्ति क्रमिक रूपमा बढ्दै गएको र अवस्था सामान्य बन्दै गएकाले उपभोक्ताले घरमा धेरै सिलिन्डर थुपार्दा कृत्रिम अभाव देखिन सक्नेप्रति संघले सचेत गराएको छ । आवश्यकताअनुसार मात्रै ग्यास खरिद गर्न र अनावश्यक रूपमा भण्डारण गरेर अरूलाई समस्यामा नपार्न संघले अपिल गरेको छ ।

एलपी ग्यास जस्तो अति आवश्यक वस्तुको आपूर्तिलाई सहज र नियमित बनाउन संघ सदैव प्रतिबद्ध रहेको अध्यक्ष चन्दले बताए । ग्यास आपूर्तिमा कुनै समस्या देखिएमा वा असहजता भएमा आधिकारिक निकायमा सम्पर्क गर्न समेत संघले सरोकारवालाहरूलाई आग्रह गरेको छ ।