फेरिचेमा हेलिकप्टर जुधे, एक पर्यटकको मृत्यु, तीन घाइते

काठमाडौं । सोलुखुम्बुको फेरिचेमा अवतरणका क्रममा दुई हेलिकप्टर आकाशमै ठोक्किँदा एक विदेशी पर्यटकको मृत्यु भएको छ भने पाइलटसहित तीन जना घाइते भएका छन् । मंगलबार बिहान ८ः११ बजे खुम्बु पासाङल्हामु गाउँपालिका–४ स्थित फेरिचे हेलिप्याडमा एयर डाइनेस्टी र फिस्टेल एयरका हेलिकप्टर ठोक्किएका हुन् ।
दुर्घटनामा फिस्टेल एयरको हेलिकप्टरमा सवार भारतको तमिलनाडु, चेन्नईका ४७ वर्षीय वसन्तकुमार बलरामुडुको मृत्यु भएको प्रहरीले जनाएको छ । घाइते हुनेमा फिस्टेल एयरका पाइलट रवीन्द्र प्रजापति, एयर डाइनेस्टीका पाइलट प्रज्ज्वल केसी र भारतीय मूलका न्युजिल्यान्डका पर्यटक ४९ वर्षीय शैलेशकिसन पटेल छन् । प्रभु हेलिकप्टरमार्फत काठमाडौं ल्याइएका तीनैजनाको नेपाल मेडिसिटी अस्पतालमा उपचार भइरहेको छ ।
अस्पतालका मेडिकल सुपरिटेन्डेन्ट डा. राज राणाका अनुसार घाइते तीनै जनाको प्रारम्भिक स्वास्थ्य परीक्षणपछि अवस्था स्थिर र खतरामुक्त रहेको पाइएको छ । उनीहरूको स्वास्थ्य अवस्थाअनुसार थप परीक्षण, उपचार र निगरानी भइरहेको अस्पतालले जनाएको छ ।
त्रिभुवन विमानस्थल कार्यालयका अनुसार एयर डाइनेस्टीको ९एन–एओडी हेलिकप्टर लुक्लाबाट फेरिचे गएको थियो भने फिस्टेल एयरको ९एन–एजेआर हेलिकप्टर गोरक्षेपबाट पुगेको थियो । दुवै हेलिकप्टर अवतरण गर्ने क्रममा ठोक्किएका हुन् । नेपाल नागरिक उड्डयन प्राधिकरणले दुर्घटनाबारे अनुसन्धान सुरु गरेको जनाएको छ ।
दुर्घटनाले खुम्बु क्षेत्रमा हेलिकप्टर उडान तथा अवतरणको सुरक्षा व्यवस्थामाथि प्रश्न उठाएको छ । फेरिचेमा एयर ट्राफिक कन्ट्रोलर (एटीसी) र टावरको व्यवस्था छैन । यस्तो स्थानमा पाइलटहरूले आपसमा सञ्चार गरेर उडान तथा अवतरण व्यवस्थापन गर्नुपर्ने हुन्छ । प्राधिकरणका अधिकारीहरूका अनुसार सामान्यतया एउटा हेलिप्याडमा पहिलो हेलिकप्टर पूर्ण रूपमा अवतरण गरी सुरक्षित स्थानमा नपुगेसम्म अर्को हेलिकप्टरलाई अवतरण अनुमति हुँदैन ।
सामाजिक सञ्जालमा सार्वजनिक दुर्घटनाको दृश्य हेरेका उड्डयन क्षेत्रका केही जानकारले पाइलटबीच समन्वयको अभाव वा अवतरण प्रक्रियामा लापरबाही भएको शंका गरेका छन् । एक प्राविधिक अधिकारीका अनुसार फेरिचेको हेलिप्याडमा एकै पटक ६–७ वटासम्म हेलिकप्टर राख्न सकिने व्यवस्था भए पनि दुर्घटनाका बेला दुवै हेलिकप्टर एउटै अवतरण बिन्दुतर्फ गएको देखिन्छ । यद्यपि दुर्घटनाको वास्तविक कारण अनुसन्धानपछि मात्र खुल्ने प्राधिकरणले जनाएको छ ।
एक पाइलटले भने तीव्र हावाको वेग वा घामको चमकका कारण अर्को हेलिकप्टर नदेखिएको हुन सक्ने अनुमान गरेका छन् । तर, यो प्रारम्भिक अनुमान मात्र भएको र दुर्घटनाको कारणबारे अहिले नै निष्कर्ष निकाल्न नसकिने उनको भनाइ छ ।
सगरमाथा आधारशिविर पदयात्राको मुख्य सिजनमा खुम्बु क्षेत्रमा दैनिक ठूलो संख्यामा हेलिकप्टर उडान तथा अवतरण हुन्छन् । तर लुक्लाभन्दा माथिका क्षेत्रमा नियामक निकायको प्रत्यक्ष उपस्थिति र निगरानी कमजोर रहेको विषयमा बेला बेलामा चिन्ता व्यक्त भइरहेका छन् । हेलिप्याडको प्राविधिक अवस्था, अवरोध र उडान व्यवस्थापनको नियमित अनुगमन नहुँदा जोखिम बढ्न सक्ने उड्डयन क्षेत्रका जानकारहरूको भनाइ छ । प्राधिकरणका प्रवक्ता विक्रमराज गौतमले दुर्घटनाको छानबिन सुरु गरिएको र प्राप्त तथ्य तथा निष्कर्षका आधारमा कानुनबमोजिम आवश्यक कारबाही र सुधारका उपाय अपनाइने बताएका छन् ।