बिहेमा जब खनियो अपरिचितको भीड...

विवाह भव्यतापूर्वक गर्न मन थियो । आफन्त थिएनन् । मण्डप र भोजका टेबल खाली हुने डरले एक चिनियाँ युवकले इन्टरनेटमार्फत अपरिचित मानिसहरूलाई आफ्नो विवाहमा आइदिन आग्रह गरे । १० हजारको भीड आएपछि ती युवाको बिहे भाइरल बन्न पुगेको छ ।
बिहे त भाइरल भयो नै, अहिले सामाजिक सञ्जालमा उनको नक्कल गरेर अकाउन्ट खोल्ने र नगद ठग्नेहरुको समेत भीड बढेको छ । 
अनलाइनमा सिआओ सिआओ सु भनेर चिनिएका २४ वर्षे सु चेङहोङको बाल्यकाल निकै संघर्षपूर्ण थियो । उनी जम्मा तीन वर्षको हुँदा उनको बुबाको निधन भयो । उनकी आमाले अर्को विवाह गरिन् । उनी र उनका दाइ चेङजिनलाई हजुरआमाले हुर्काइन् । विडम्बना, सु सात वर्षको हुँदा ती हजुरआमाले पनि यो संसार छाडिन् । त्यसपछि दुई दाजुभाइ एकअर्काको सहारा बने । 
सुले बाल्यकालदेखि नै निर्माण मजदुरदेखि डेलिभरी ड्राइभरसम्मको काम गरेर आफ्नो र दाइको पेट पाले । कडा मेहनत गरेर उनले आफ्नो विवाहको लागि भनेर करिब एक लाख ६० हजार युआन (चिनियाँ मुद्रा) जम्मा गरेका थिए ।
कामको क्रममा फेला परेकी प्रेमिका लुओ चुईसँग विवाह गर्ने पक्का हुँदा विवाहमा जन्ती नै कोही नहोलान् भन्ने उनको चिन्ता थियो । भोजका लागि तीनवटा टेबल पनि नभरिने हो कि भन्ने चिन्ताले उनलाई सतायो । यही एक्लोपन र रित्तोपन महसुस गर्दै उनले अक्टोबर २५ मा चीनको चर्चित सामाजिक सञ्जाल ‘दोउयिन’ (टिकटकको चिनियाँ संस्करण) मा एउटा भिडियो पोस्ट गरे । भिडियोमा उनले आफ्नो पारिवारिक अवस्था र बाल्यकालको दुःख सुनाउँदै अपरिचित मानिसहरूलाई आफ्नो विवाहमा सहभागी भएर टेबल भरिदिन आग्रह गरे । उनले चिनियाँ परम्पराअनुसार दिइने नगद उपहार नल्याउन पनि विशेष अनुरोध गरेका थिए । उनले मानिसहरूको उपस्थिति र आशीर्वाद मात्र चाहेको बताएका थिए ।
त्यो एउटा सामान्य भिडियोले चिनियाँ इन्टरनेटमा यस्तो तहल्का मच्चायो कि उनको इमानदारी देखेर गएको शनिबार पाहुनाहरूको ओइरो लाग्यो । हवाईजहाज, रेल र आफ्नै गाडी चढेर मानिसहरू चीनभरिबाट त्यहाँ पुगे । सुले धेरैमा एक दर्जन अतिथि आउलान् भन्ने सोचेका थिए तर त्यहाँ त १० हजारभन्दा बढी मानिस उपस्थित भए । पाहुना पनि खाली हात आएका थिएनन् । सुले नगद नल्याउनु भनेकाले पाहुनाहरूले जिउँदा सुँगुर, भेडा, कुखुरा लगायतका खानेकुरादेखि लिएर फ्रिजर र इलेक्ट्रिक हिटरजस्ता घरायसी सामानहरू उपहारस्वरूप लिएर आएका थिए । 
यति ठुलो भीडलाई खाना खुवाउनु र व्यवस्थापन गर्नु सजिलो थिएन तर पाहुना स्वयंले सबै कुराको जिम्मा लिए । जो पकाउन जान्दथे, तिनले भोज पकाए । नजान्नेले तरकारी काटे, कसैले मण्डप सजाए । दुलही लुओ चुईको मेकअप गर्न मेकअप आर्टिस्टहरूले निःशुल्क सेवा दिए । त्यति मात्र होइन, एक जना अपरिचित व्यक्तिले त विवाहको गाडीको रूपमा प्रयोग गर्न निकै महँगो ‘मेब्याक’ कार नै उपलब्ध गराए भने अन्य धेरैले गाडीहरूको लाइन मिलाएर विवाहको ¥याली निकाले । एक जना अनलाइन इन्फ्लुएन्सरले त विवाहको लागि भनेर ९,९९९ वटा राता गुलाबका फूलहरू उपहार ल्याएका थिए ।
जन्तीको भीड यस्तो धेरै बढ्यो कि सुको सानो घर र आँगनले धान्न सकेन । गाउँमा गाडी र मान्छेको चाप बढेपछि स्थानीय सरकारले पनि यसलाई सकारात्मक रूपमा लियो । प्रशासनले विवाहको कार्यक्रमलाई गाउँको सानो ठाउँबाट सारेर एउटा ठुलो सार्वजनिक चौरमा व्यवस्थापन गरिदियो । ट्राफिक व्यवस्थापन, सुरक्षा र खानाको प्रबन्धमा स्थानीय अधिकारीहरूले सहयोग गरे । त्यो दिन गाउँका र वरपरका सबै होटेलहरू पूर्ण रूपमा भरिएका थिए भने स्थानीय रेस्टुरेन्टको व्यापार ह्वात्तै बढेको थियो । विवाहको दिन बेलुका नवदम्पतिले परम्परागत मियाओ पोसाक लगाएर हजारौं मानिसहरूसँगै बोनफायर (आगो बालेर नाचिने) नृत्य गर्दै खुसीयाली मनाए ।
यस घटनालाई चिनियाँ सञ्चारमाध्यमहरूले निकै महŒवका साथ प्रसारण गरे । चिनियाँ मिडियाहरू सधैं यस्ता सकारात्मक र प्रेरणादायी कथाहरूको खोजीमा हुन्छन् । युन्नान टेलिभिजनले यो विवाहलाई ‘अपरिचित मानिसहरू पनि कसरी परिवार बन्न सक्छन् र इन्टरनेटले कसरी गहिरो मानवीय भावना बोक्न सक्छ’ भन्ने कुराको प्रमाण भएको बताएको छ । 
तर, यति राम्रो कथासँगै केही नकारात्मक कुराहरू पनि जोडिएर आएका छन् । यो घटना भाइरल भएपछि सामाजिक सञ्जालमा सुको नाम गरेर धेरै नक्कली खाता (फेक अकाउन्ट) हरू खोलिए । ती नक्कली खाताहरूले मानिसहरूको भावनासँग खेल्दै पैसा ठग्ने प्रयास गरिरहेका छन् । यही कारणले गर्दा अहिले सु र उनकी पत्नी लुओले सामाजिक सञ्जालमा मौनता साँधेका छन् । उनीहरू यस्तो ठगी देखेर निकै चिन्तित छन् । घटनाले यति ठुलो रूप लिएपछि कतिपयले यो सबै चर्चा कमाउनको लागि गरिएको नाटक (सेट–अप) हो कि भनेर पनि शंका गरे । तर, सुका दाइ चेङजिनले भनेका छन्, ‘स्थिति यति धेरै अनियन्त्रित हुनेछ र यति धेरै मानिसहरू आउलान् भन्ने हामीले कहिल्यै सोचेका थिएनौं ।’
एउटा सामान्य अपिलले जुटाएको यो १० हजार मानिसको भीडले संसारमा अझै पनि निस्वार्थ माया र सहयोग गर्ने मानिसहरूको कमी छैन भन्ने देखाएको छ । एउटा टुहुरो युवकले आफ्नो बिहेमा कोही नआउलान् भनेर पीर मानेको थियो, उसलाई सारा देशले नै आशीर्वाद दियो । यो घटनाले प्रविधिको सही सदुपयोगले कसरी एउटा व्यक्तिको जीवनमा खुसीको बहार ल्याउन सक्छ भन्ने कुरालाई देखाएको छ ।