इनमको बयानले कांग्रेस आधिकारिकता विवाद पुनः सतहमा

काठमाडौं । बिचौलिया इनम सापकोटाको बयानको अडियो रेकर्ड बाहिरिएको छ । प्रहरीसमक्ष दिएको भनिएको बयानको अडियो रेकर्ड मंगलबार सार्वजनिक भएपछि कांग्रेसको आधिकारिकतासम्बन्धी विवाद फेरि चर्चामा आएको छ । 
पूर्वप्रधानन्यायाधीश चोलेन्द्रशमशेर राणामार्फत कांग्रेसको आधिकारिकतासहित विभिन्न मुद्दामा करोडौं रुपैयाँको लेनदेन र सेटिङ भएको दाबी सापकोटाले गरेको अडियो सार्वजनिक भएपछि विवादले नयाँ मोड लिएको हो । समानान्तर महाधिवेशनको तयारीमा लागेको निवर्तमान सभापति शेरबहादुर देउवा पक्षले उक्त अडियोको आधारमा छानविनको माग गरेको छ । संस्थापनपक्षले भने सरकारले आफ्नो विरोधी तह लगाउन गरेको षड्यन्त्र भएको टिप्पणी गर्दै पार्टी आधिकारिकताका लागि पैसा खुवाएको आरोप अस्वीकार गरेको छ । 
सम्पत्ति शुद्धीकरणसम्बन्धी कसुरमा अनुसन्धानका क्रममा रहेका सापकोटाले नयाँ बानेश्वरस्थित आइप्लेक्स मलको विवाद र काठमाडौं जिल्ला अदालतमा विचाराधीन नवीन तुलाधरको ठगीसम्बन्धी मुद्दामा समेत रकम लेनदेन भएको बताएको बयानको अडियोमा सुनिन्छ । उनले पूर्वप्रधानन्यायाधीश राणा र उनका भाइ प्रभु शमशेरमार्फत रकम आएको दाबी गरेका छन् । कांग्रेसको आधिकारिकतासम्बन्धी मुद्दामा गगन थापा नेतृत्वको पक्षले आफ्नो पक्षमा फैसला गराउन १८ करोड रुपैयाँको डिल गरेको प्रसंगसमेत उनले बयानका क्रममा बताएका छन् ।  यद्यपि, उक्त कारोबारमा आफू प्रत्यक्ष सहभागी नभएको र राणाबाट सुनेको कुरा मात्रै बयानमा राखेको उनको भनाइ छ । उक्त मुद्दामा कांग्रेस नेता उमेश श्रेष्ठ, सर्वोच्च्की न्यायाधीश सारंगा सुवेदीको नाम समेत उनले जोडेका छन् । 
सापकोटाले पूर्वप्रधानमन्त्री तथा निवर्तमान कांग्रेस सभापति शेरबहादुर देउवा, पूर्वमन्त्री दीपक खड्कालगायतसँग पूर्वगृहमन्त्री बालकृष्ण खाँणमार्फत चिनजान भएको पनि बयानमा उल्लेख गरेका छन् । आफ्नो प्रत्यक्ष सम्बन्ध राणासँग मात्रै रहेको र अन्य व्यक्तिसँगको चिनजान पनि उनकै माध्यमबाट भएको उनको दाबी छ । 
संस्थापनको अस्वीकार, इतरले माग्यो छानबिन
सापकोटाको बयान सार्वजनिक भइरहेका बेला कांग्रेस संस्थापन पक्षले यसलाई सरकारको षड्यन्त्र भएको बताएको छ । सभापति थापा निकट मानिने सहमहामन्त्री अजयबाबु शिवाकोटीले सभापति थापालाई रक्षात्मक बनाउन सरकारले आफ्नो ऐसेट (इनम) प्रयोग गरेको टिप्पणी गरेका छन् । ‘सरकारले आफ्नो एसेट कसलाई कतिखेर कहाँ प्रयोग गर्छ उसको कुरा हो। तर नेपाली कांग्रेसका पार्टी सभापति गगनकुमार थापालाई रक्षात्मक बनाउन बाहिर ल्याइएको कन्टेन्ट पूरा छेडखानी गरिएको रहेछ । आफूलाई यो कुरा चाहियो भनेपछि रेकर्ड गर्न लगाएर बाहिर ल्याइएको अडियो पुरै सुन्दा पनि प्रष्ट हुन्छ,’ उनले भनेका छन्, ‘यसमा बिचौलियाको भूमिकामा सरकारले प्रयोग गरेको इनम सापकोटाको टुक्रा टुक्रा जोडेर सिंगो जस्तो बनाइएको अडियोको क्वालिटी र त्यसको लय सुन्दा पनि थाहा हुन्छ ।’ उनले प्रहरी हिरासतमा रहँदा रेकर्ड गरिएको बयान (अडियो समेत) अदालतले समेत प्रमाण नमान्ने भन्दै सरकारले विपक्षी आवाज थुन्ने प्रोपोगण्डा गरेको दाबी गरेका छन् । ‘अनि प्रहरी कहाँ भएको व्यक्तिको बयान अदालतले त प्रमाण मान्दैन भने त्यसमाथि सरकारले आफूमाथि प्रश्न गर्नेहरुलाई तह लाउन भनेर यसरी सेलेक्टिभ स्वरूपमा बाहिर ल्याएको कुरा सामान्य कमनसेन्स भएको व्यक्तिले समेत पत्याउँदैन भन्ने सरकारी प्रोपोगण्डा मेसिनरीले बुझ्दा राम्रो,’ शिवाकोटीले भनेका छन् । 
तर, कांग्रेसइतरपक्षले भने देउवा पक्षले आधिकारिकतासम्बन्धी विवादमा भएका भनिएका चलखेलबारे निष्पक्ष छानबिनको माग गरेको छ । चुनदेवीस्थित सम्पर्क कार्यालयमा मंगलबार पत्रकार सम्मेलन गर्दै देउवा पक्षले विशेष महाधिवेशनबाट चयन भएको नेतृत्वलाई निर्वाचन आयोगले दिएको आधिकारिकतासँग जोडिएका विषयमा सार्वजनिक भइरहेका तथ्यको गम्भीर अनुसन्धान हुनुपर्ने बताएको छ । कांग्रेस नेता डा. प्रकाशशरण महतले सञ्चारमाध्यममार्फत सार्वजनिक भइरहेका नयाँ तथ्य र प्रहरी अनुसन्धानका क्रममा आएका भनिएका विवरण गम्भीर रहेको भन्दै सबै पक्षको भूमिका छानबिन हुनुपर्ने बताए । ‘अहिले मिडियामार्फत नयाँ–नयाँ तथ्यहरू सार्वजनिक भइरहेका छन् । प्रहरीले जानकारी लिने र सोधपुछ गर्ने क्रममा कसले के भन्यो भन्ने विवरणहरू पनि बाहिर आइरहेका छन् । यी विषय निकै गम्भीर छन्,’ उनले भने, ‘त्यसैले यसको गहिराइसम्म पुगेर निष्पक्ष र गम्भीर छानबिन हुनुपर्छ । सबै तथ्य र प्रमाणका आधारमा मात्रै निर्णय गरिनुपर्छ ।’ महतले कांग्रेसको आधिकारिकता विवादमा निर्वाचन आयोग र अदालतमा भएको भनिएको चलखेलको अनुसन्धान संवैधानिक निकायबाट हुनुपर्ने माग गरे । 
उनले गत पुसमा सम्पन्न विशेष महाधिवेशनलाई आधिकारिकता दिने निर्वाचन आयोगको निर्णयप्रति सुरुदेखि नै असहमति रहेको पनि बताए । आयोगका एक आयुक्तले समेत विधि र प्रक्रिया नमिलेको भन्दै निर्णयमा नोट अफ डिसेन्ट लेखेको स्मरण गराउँदै महतले पर्याप्त प्रमाण र दुवै पक्षको कुरा नसुनी आयोगले हतारमा निर्णय गरेको आरोप लगाए । इतरपक्षले नेता जीतजंग बस्नेतले चोलेन्द्र शमशेर राणले  निर्वाचन आयुक्त आफ्ना भाइ नाता पर्ने सगुनशमशेर राणा प्रयोग गरेर पार्टी आधिकारिता अर्को पक्षलाई दिलाइ दिएको भन्दै छानविनको माग गरेका छन् ।  
विशेष महाधिवेशनको विषयमा तत्कालिन सभापति देउवा पक्षधर विरुद्धमा थिए भने तत्कालीन महामन्त्री गगन थापा र विश्वप्रकाश शर्मा पक्षमा थिए । थापा र शर्माको अगुवाइमा विशेष महाधिवेशन सम्पन्न भएपछि आधिकारिकता विवाद निर्वाचन आयोग र सर्वोच्च पुगेको थियो । आयोगले विशेष महाधिवेशनलाई आधिकारिकता दिएको थियो भने सर्वोच्चले आयोगको निर्णय नै सदर गरिदिएको थियो । तर, पुनः देउवा पक्षको निवेदनमा सर्वोच्चले आधिकारिकता विवादको मुद्दामा निस्सा दिएको थियो । थापा नेतृत्वमा यो पक्षले १५ औं महाधिवेशन सम्पन्न गरिसकेको छ भने देउवा पक्ष मंसिर तेस्रो साता महाविधेशन गर्दैछ ।