हार्भी वाइनस्टिनलाई १५ वर्षको जेल सजाय

न्यायाधीशले बुधबार हलिउडका कुख्यात फिल्म निर्माता हार्भी वाइनस्टिनलाई १५ वर्षको जेल सजाय सुनाएका छन् । यो सजायसँगै बदनाम निर्माता वाइनस्टिनसँग जोडिएको लामो र जटिल कानुनी घटनाक्रमको अर्को अध्याय थपिएको छ ।
वाइनस्टिनलाई गत वर्ष जुरीले दुई दशकअघि ‘प्रोजेक्ट रनवे’की निर्माण सहायक मिरियम हेलीलाई जबर्जस्ती मुखमैथुन गराएको आरोपमा आपराधिक यौन अपराधको एक मुद्दामा दोषी ठहर गरेको थियो । पछिल्लो ६ वर्षमा न्युयोर्कमा तीनपटक आपराधिक सुनुवाइ भइसकेपछि हेलीसम्बन्धी यही मुद्दा राज्यमा वाइनस्टिनविरुद्ध कायम रहेको एकमात्र दोषसिद्धि बनेको छ । उनका कानुनी प्रतिनिधिले यसविरुद्ध पुनरावेदन गर्ने बताएका छन् ।
म्यानहट्टनस्थित राज्य अदालतमा भएको सुनुवाइका क्रममा ७४ वर्षीय वाइनस्टिनले आफू निर्दोष रहेको दाबी दोहो¥याए तर उनले आफूबाट केही गल्ती भएको स्वीकार गरे । फिक्का देखिएका र ह्विलचेयरमा बसेका उनले भने, “म धेरै पछुतोसँग बाँचिरहेको छु र मेरा कामबाट चोट पुगेका सबैसँग म हृदयदेखि माफी माग्छु ।”
अभियोजन पक्षले वाइनस्टिनलाई २० वर्षको जेल सजाय दिन माग गरेको थियो । अभियोजकहरूले उनीमा आफ्नो कामप्रति पश्चात्ताप नदेखिएको बताएका थिए तर उनका प्रतिरक्षा वकिलहरूले स्वास्थ्य अवस्था कमजोर हुँदै गएको भन्दै नौ वर्षको सजाय माग गरेका थिए ।
न्यायाधीश कर्टिस फार्बरले वाइनस्टिनलाई ‘मीटु आन्दोलनको वास्तविक अनुहार’ भन्दै उनको पश्चात्तापको अभाव र हानिकारक व्यवहारलाई कडा सजायका पक्षमा जाने आधारका रूपमा उल्लेख गरे ।
अदालतको दर्शकदीर्घामा वाइनस्टिनविरुद्ध कानुनी कारबाहीका क्रममा बयान दिएका अन्य केही महिला पनि उपस्थित थिए । हेलीले भावुक हुँदै अदालतमा आफूले यौन दुव्र्यवहारको पीडा भोग्नुपरेको मात्र नभई त्यसबारे पटक–पटक बयान दिँदा पनि थप पीडा सहनुपरेको बताइन् ।
उनले भनिन्, “बोल्ने र न्याय खोज्ने साहस गरेकाले अब आउने वर्षौँसम्म मैले पछाडि फर्केर हेरिरहनुपर्नेछ ।”
वाइनस्टिनलाई हाल बेलभ्यु अस्पतालको कारागार वार्डमा राखिएको छ ।
यो सजाय न्युयोर्क राज्यमा वाइनस्टिनविरुद्ध चलेको आपराधिक मुद्दासम्बन्धी वर्षौँ लामो कानुनी प्रक्रियापछि आएको हो । निर्मातामाथि यौन दुव्र्यवहारको लामो समयदेखिको ढाँचासम्बन्धी सञ्चारमाध्यमका रिपोर्ट सार्वजनिक भएपछि न्युयोर्कका अभियोजकहरूले सन् २०१८ मा पहिलोपटक उनीविरुद्ध अभियोग लगाएका थिए । ती रिपोर्टले विश्वव्यापी रूपमा चर्चित बनेको ‘मीटु’ आन्दोलनलाई गति दिएको थियो ।
केही वर्षपछि वाइनस्टिन मुद्दाको सुनुवाइमा गए र हेलीसम्बन्धी आपराधिक यौन अपराध तथा अभिनेत्री बन्न प्रयासरत जेसिका मानमाथि जबर्जस्ती यौनसम्बन्ध राखेको आरोपमा तेस्रो तहको बलात्कारको मुद्दामा दोषी ठहर भए ।
न्यायाधीशले उनलाई २३ वर्षको जेल सजाय सुनाएका थिए तर न्युयोर्कको सर्वोच्च अदालतले उक्त दोषसिद्धि खारेज गरिदियो । मुद्दामा आरोप नलगाइएका अन्य महिलाहरूलाई पनि बयान दिन अनुमति दिएर न्यायाधीशले गलत निर्णय गरेको ठहर अदालतले गरेको थियो ।
त्यसपछि भएको दोस्रो सुनुवाइमा जुरीले वाइनस्टिनलाई यौन अपराधको मुद्दामा दोषी ठहर ग¥यो । अर्की एक महिलासँग सम्बन्धित आरोपमा भने उनलाई सफाइ दिइयो भने तेस्रो तहको बलात्कारको आरोपमा जुरी कुनै निष्कर्षमा पुग्न सकेन ।
तेस्रोपटक गठित जुरी पनि बलात्कारको आरोपमा कुनै निष्कर्षमा पुग्न असफल भयो । त्यसपछि अभियोजकहरूले उक्त आरोपमा थप सुनुवाइ नगर्ने निर्णय गरे ।
गत वर्ष भएको वाइनस्टिनको सुनुवाइका क्रममा अभियोजक निकोल ब्लुमबर्गले अदालतमा कमजोर र अस्वस्थ देखिएका वाइनस्टिनसँग कुनै समय मनोरञ्जन उद्योगमा अत्यन्त ठूलो शक्ति रहेको बताएकी थिइन् ।
उनले जुरीलाई भनेकी थिइन्, “प्रतिवादीले आफ्नो शक्ति र प्रभाव प्रयोग गरेर धेरै, धेरै एकेडेमी अवार्ड जितेका चलचित्र निर्माण गरे । तर उनले त्यही शक्ति र प्रभाव महिलाहरूलाई एक्ल्याउन, आफू उनीहरूसँग एक्लै हुने ठाउँमा उनीहरूलाई फसाउन र बलात्कार गर्न पनि प्रयोग गरे ।”