प्रेमप्रसंगले डुबायो ४ ट्रिलियन डलरको साम्राज्य

सिलिकन भ्यालीमा एउटा भनाइ निकै चर्चित छ– प्रविधिले दुनियाँ बदल्न सक्छ तर मानिसको आधारभूत स्वभाव बदल्न सक्दैन । यन्त्रमेधा (एआई) को संसारमा एकछत्र राज गरिरहेको चार ट्रिलियन डलरको विशाल कम्पनी ‘एनभीडिया’का निवर्तमान प्रमुख जेन्सन हुआङको जीवनमा यो भनाइ अचूक रूपमा लागू भएको छ । ३३ वर्षसम्म कम्पनीलाई कुशलतापूर्वक हाँकेका ६३ वर्षीय यी ‘टेक–जाइन्ट’को अवनति कुनै प्राविधिक विफलता वा खराब व्यापारिक रणनीतिका कारण नभई आफ्नै कम्पनीका कर्मचारी र एक सन्दिग्ध चिनियाँ जासुससँगको शृंखलाबद्ध र गोप्य प्रेमप्रसंगका कारण हुन पुगेको छ । यस घटनाले संसारकै कर्पोरेट र प्रविधि जगतमा एउटा ठूलो भूकम्प ल्याइदिएको छ ।
बाहिरबाट हेर्दा जेन्सन हुआङको जीवन ‘अमेरिकन ड्रिम’को एउटा गज्जबको चित्रजस्तो देखिन्थ्यो । ताइवानमा जन्मिएर नौ वर्षको उमेरमा अमेरिका पुगेका उनले किशोर अवस्थामा ‘डेनिज’ रेस्टुरेन्टमा भाँडा माझ्ने काम गरेका थिए । ओरेगन स्टेट युनिभर्सिटीमा इन्जिनियरिङ पढ्दै गर्दा उनको भेट लोरीसँग भयो । त्यो भेट प्रेममा बदलियो र उनीहरूले विवाह गरे । ४० वर्षभन्दा लामो वैवाहिक जीवनमा लोरीले आफ्ना पतिलाई सफल बनाउन आफ्नो करिअरको समेत पर्वाह गरिनन् । हुआङले लगाउने चर्चित कालो लेदर ज्याकेट छनोट गर्नेदेखि लिएर घरको सम्पूर्ण आर्थिक व्यवस्थापन लोरीले नै सम्हालेकी थिइन् । हुआङ आफैं पनि सार्वजनिक मञ्चहरूमा श्रीमतीको खुलेर प्रशंसा गर्थे । उनी सिलिकन भ्यालीका अन्य धनाढ्यहरूभन्दा फरक, एक अत्यन्तै पारिवारिक र इमानदार पतिको रूपमा चिनिन्थे । तर, यो आदर्श छविको पर्दा पछाडि एउटा अर्कै कालो सत्य हुर्किरहेको थियो ।
उनको पतनको सुरुवात आफ्नै कार्यालयभित्र गुपचुप चलिरहेको रोमान्सबाट भयो । द न्यू योर्क टाइम्सको रिपोर्टअनुसार, हुआङको एनभीडियामै भाइस–प्रेसिडेन्ट (हेल्थकेयर) का रूपमा कार्यरत ४८ वर्षीया किम्बर्ली पावेलसँग गहिरो प्रेमसम्बन्ध थियो । पावेल विगत १८ वर्षदेखि सोही कम्पनीमा थिइन् । उनीहरूको यो गोप्य सम्बन्ध त्यतिबेला सतहमा आयो, जतिबेला गत मार्च महिनामा भएको एउटा कन्फ्रेन्सका क्रममा उनीहरू दुवै एउटा होटलमा अत्यन्तै अन्तरंग र आपत्तिजनक अवस्थामा भेटिए । एक व्यक्तिले उनीहरूको त्यो भिडियोसमेत खिचेका थिए । घटना बाहिर आउन नदिन हुआङका सुरक्षाकर्मीले ती व्यक्तिलाई जबर्जस्ती ‘नन–डिस्क्लोजर एग्रिमेन्ट’ अर्थात् मौन बस्ने सम्झौतामा हस्ताक्षर गर्न लगाएका थिए । यति मात्र होइन, रोयटर्सका अनुसार एनभीडियाकै अर्की एक गोप्य महिला कर्मचारीसँग पनि हुआङको शारीरिक तथा भावनात्मक सम्बन्ध थियो । आफ्नै दुई छोराछोरी (छोरी म्याडिसन र छोरा स्पेन्सर) उच्च पदमा कार्यरत रहेको कम्पनीभित्रै प्रमुख कार्यकारीबाट भएको यस्तो आचरणले धेरैलाई स्तब्ध बनायो ।
तर, हुआङको जीवनमा भूकम्प ल्याउने सबैभन्दा विनाशकारी प्रेमप्रसंग भने सिंगापुरस्थित डाटा सेन्टर कम्पनी ‘मेगास्पिड इन्टरनेसनल’की पूर्व–कार्यकारी एलिस हुआङसँगको थियो । करिब ४० वर्षकी यी चिनियाँ व्यवसायीसँगको सम्बन्ध एउटा विवाहेत्तर रोमान्स मात्र नभएर अन्तर्राष्ट्रिय जासुसीको एउटा खतरनाक ‘हनीट्रयाप’ (सुन्दरी जासुसको प्रेमजाल) थियो कि भन्ने आशंका अमेरिकी अधिकारीहरूले गरेका छन् । 
सन् १९८३ मा पेरिसमा पक्राउ परेका फ्रान्सेली कूटनीतिज्ञ बर्नार्ड बोर्सिकोटलाई एक चिनियाँ ओपेरा गायकले प्रेमजालमा पारेर गोप्य सूचना चुहाउन लगाएझैं, एलिसले पनि जेन्सन हुआङलाई आफ्नो जादुमा पारेकी थिइन् । एलिससँग एकान्तमा बिताएका प्रेमिल रातहरूमा जेन्सनले राष्ट्रपति डोनाल्ड ट्रम्पसँगका गोप्य कुराकानी सुनाएको हुन सक्ने वा एलिसले सुटुक्क जेन्सनको फोनमार्फत एनभीडियाको उन्नत एआई प्रविधिका गुप्त सूचनाहरू हात पारेको हुन सक्ने गम्भीर आशंका गरिएको छ । 
एलिसलाई चीनको गुप्तचर निकाय ‘मिनिस्ट्री अफ स्टेट सेक्युरिटी’ (एमएसएस) ले तयार पारेकी ‘घातक सुन्दरी’ (फेम फेटल) का रूपमा हेरिएको छ । उनका माध्यमबाट अर्बौं डलरको प्रविधि अमेरिकी कानुन छल्दै चीन पुगेको हुन सक्ने अनुमान गरिएको छ ।
एकपछि अर्को गर्दै आफ्ना गोप्य रोमान्सका कथाहरू छताछुल्ल भएपछि जेन्सन हुआङले हार मानेका छन् । उनले गत आइतबार नै आफ्ना कर्मचारीहरूलाई पत्र लेख्दै आफ्नो गल्ती स्वीकार गरेका थिए । ‘म मेरी श्रीमतीप्रति इमानदार रहिनँ... मैले जे गरेँ, त्यसको कुनै बहाना वा माफी हुन सक्दैन । म हृदयदेखि नै दुःखी छु,’ उनले आफ्नो बयानमा भनेका छन् । तर, उनको यो पश्चात्तापले कम्पनीको ओरालो यात्रालाई भने रोक्न सकेन ।
उनको राजीनामाको समाचार बाहिरिनासाथ सेयर बजारमा एनभीडियाको मूल्य ४.३ प्रतिशतले घट्यो । यसको अर्थ, एकैदिनमा कम्पनीको एक खर्ब ८० अर्ब डलर स्वाहा भयो । कम्पनीका चिफ फाइनान्सियल अफिसर कोलेट क्रेसलाई हाल अन्तरिम जिम्मेवारी दिइएको छ तर स्पष्ट उत्तराधिकारी नहुँदा कम्पनी ठूलो अन्योलमा छ । नयाँ प्रमुख छान्ने विषय कम्पनीका लागि फलामको चिउरा चपाउनुसरह भएको छ । ट्रम्पले त एप्पलका पूर्व प्रमुख टिम कुक मात्रै उनको विकल्प हुन सक्ने टिप्पणीसमेत गरेका छन् । अहिले यो कम्पनी र हुआङमाथि अमेरिकी न्याय मन्त्रालय, एफबीआई र कंग्रेसले गम्भीर अनुसन्धान गरिरहेका छन् ।
आर्टिफिसियल इन्टेलिजेन्सको क्रान्तिलाई जन्म दिएका जेसन र संसारकै भविष्य कोर्ने प्रविधिको नेतृत्व गरेका उनी आफ्नै मानवीय कमजोरी र वासनाको सिकार बन्न पुगे । एउटी समर्पित पत्नी, सफल सन्तान र चार खर्ब डलरको अकल्पनीय साम्राज्य हुँदाहुँदै पनि, आफ्नै कर्मचारी र एक सन्दिग्ध जासुससँगको क्षणिक प्रेमप्रसंगले उनको वर्षौंको मेहनत र प्रतिष्ठालाई एकै झट्कामा खरानी बनाइदिएको छ । यस घटनाले प्रविधिको संसारलाई मात्र होइन, शक्तिको चरम चुचुरोमा पुगेको मानिस पनि आफ्ना इच्छाहरूको दास बन्न पुग्छ भन्ने उदांगो पारेको छ ।