कास्कीमा जेनजी आन्दोलनमा लुटिएका हतियार अझै फेला परेन

कास्की । जेनजी आन्दोलन र त्यसपछिको विध्वंसका कारण कास्कीका सुरक्षा बलहरू अझै प्रभावित छन् । नेपाल प्रहरी र सशस्त्र प्रहरीबाट १ हजारभन्दा बढी सुरक्षाकर्मीले राजीनामा दिइसकेका छन् भने लुटिएका हात हतियार अझै नियन्त्रणमा आएका छैनन् । यसले प्रहरीको मनोबल कमजोर भएको छ र जनताको सहयोग आवश्यक रहेको सुरक्षा अधिकारीहरूले बताएका छन् ।

गत भदौ २३ र २४ गतेको जेनजी प्रदर्शनले कास्कीमा नेपाल प्रहरीका जिल्ला कार्यालय, ट्राफिक कार्यालय र केही वडा प्रहरी कार्यालय ध्वस्त भएका थिए । प्रहरीका अनुसार, प्रदर्शनमा संलग्न ३० जनालाई मुद्दा दायर गरिएको छ, जसमा हात हतियार खरखजानामा एकजना, चोरीमा तीनजना, अपराधिक उपद्रोहमा १८ जना र उच्छृंखल गतिविधिमा आठ जनालाई मुद्दा चलाइएको छ ।

तर चोरिएका हात हतियारहरू पूर्ण नियन्त्रणमा छैनन्, जसले सुरक्षा बलको काममा थप चुनौती थपेको छ ।

कास्की प्रहरी प्रवक्ता हरिबहादुर बस्नेतका अनुसार, सुरक्षाकर्मीको मनोबल मात्र होइन, जेनजी आन्दोलनमा नष्ट भएका उपकरण, सवारीसाधन र पूर्वाधारहरूको अभावले नियमित सुरक्षा गस्ती, ट्राफिक चेकजाँच र अन्य सुरक्षा कार्यहरू प्रभावित भएको छ ।

प्रमुख जिल्ला अधिकारी रुद्रादेवी शर्माले पनि सुरक्षाकर्मीको मनोबल घटेको स्वीकार गर्दै भनेकी छिन्, ‘यो विषम परिस्थितिमा जनताले सुरक्षाकर्मीलाई र सुरक्षाकर्मीले जनतालाई साथ दिनुपर्छ ।’

जेनजी आन्दोलनपश्चात् बनेको सुशीला कार्की नेतृत्वको सरकारले शान्ति, सुरक्षा र अमन कायम गर्ने प्रयास गरे पनि सुरक्षाकर्मीका लागि आवश्यक पूर्वाधार, उपकरण र हतियार उपलब्ध नगराएकाले फिल्डमा काम गर्न कठिनाइ भएको छ । यसले न केवल सुरक्षाकर्मीको मनोबल घटाएको छ, तर आम नागरिकले पनि शान्ति सुरक्षाको अनुभूति गर्न पाएका छैनन् ।

विशेषज्ञहरू चेतावनी दिन्छन् कि यदि तत्काल ध्यान नदिने हो भने भविष्यमा सुरक्षा चुनौती अझ भयावह हुन सक्छ ।