एन्टीडोपिङमा पार्कर असफल

पूर्व हेभिवेट च्याम्पियन जोसेफ पार्करले आफूले कुनै पनि प्रतिबन्धित पदार्थ नलिएको बताएका छन् । गएको महिनाको फाबियो वार्डलीविरुद्धको पराजयपछि आएको उनको असफल डोप टेस्ट ‘पूर्ण रूपमा आश्चर्यजनक’ भएको पार्करले प्रतिक्रिया दिएका छन् ।

न्युजिल्यान्डका ३३ वर्षीय पार्करले लडाइँको दिन नै स्वेच्छाले दिएको एन्टी–डोपिङ परीक्षणमा ‘एडभर्स फाइन्डिङ’ (अर्थात् अनधिकृत पदार्थको उपस्थिति देखिने नतिजा) आएको प्रमोशन कम्पनी क्विन्सबेरीले शुक्रबार जानकारी गराएको हो ।

अक्टोबर २५ मा लन्डनको ओ–टु एरिनामा भएको खेलमा वार्डलीले ११औँ राउण्डमा पार्करलाई रोकेका थिए । ‘हालैको लडाईंअघि मैले स्वेच्छाले टेस्ट गराएको थिएँ र अहिले मात्र यो नतिजा आएको भनिएको छ । यो मैले अपेक्षा नै गरेको थिइनँ,’ पार्करले इन्स्टाग्राममा लेखेका छन् ।

‘मैले कुनै प्रतिबन्धित पदार्थ लिएको छैन, म क्षमता बढाउने कुनै औषधि प्रयोग गर्दिनँ र त्यसको समर्थन पनि गर्दिनँ,’ उनले भनेका छन्, ‘म अहिले भइरहेको प्रक्रियामा पूर सहयोग गरिरहेको छु र छानबिनले मेरो नाम सफाइ गरिदिनेमा म विश्वस्त छु।’

डोपिङमा असफल भएपछि पार्करलाई अब बेलायतको बक्सिङ नियामक निकाय ब्रिटिश बक्सिङ बोर्ड अफ कन्ट्रोलले लामो निलम्बन गर्न सक्ने सम्भावना छ ।

शुक्रबार क्विन्सबेरीले भोलुन्टरी एन्टीडोपिङ एशोसिएसन (भाडा)ले सबै पक्षलाई नतिजाबारे सूचित गरेको र छानबिन सकिनुअघि थप टिप्पणी नगर्ने जनाएको थियो । पार्करले डिसेम्बर २०१६ मा एन्डी रुइज जूनियरलाई हराउँदै डब्लुबीओ उपाधि जितेका थिए। उनले मार्च २०१८ मा कार्डिफको प्रिन्सिपालिटी स्टेडियममा एन्थोनी जोशुवासँग उपाधि गुमाएका थिए ।